سیشن کورٹ کے باہر پی ٹی آئی رہنما حلیم عادل شیخ نے میڈیا سے گفتگو کرتے ہوئے کہا کہ علی پلھ پرجھوٹی ایف آئی آر کاٹی گئی ہے۔

تفصیلات کے مطابق سیشن کورٹ کے باہر پی ٹی آئی رہنما حلیم عادل شیخ نے میڈیا سے گفتگو کرتے ہوئے کہا کہ علی پلھ نے پانی چوروں کی ویڈیو بنا کر بے نقاب کیا ہے۔

انہوں نے کہا کہ حکمران خاندان کی نہریں بھری ہوئی ہیں، آبادگاروں غریبوں کی نہروں میں پانی نہیں ہے، آج شہری اس عوامی مقدمے میں ساتھ تھے۔

پی ٹی آئی کے رہنما نے یہ بھی کہا کہ اصل پانی چور سندھ کے حکمران ہیں اور ان کے سربراہ آصف علی زرداری ہیں۔ بلاول ان پکے کے ڈاکووں کی سرپرستی کررہے ہیں۔

حلیم عادل شیخ نے کہا کہ آواز بلند کرنے پر دہشتگردی کے مقدمات بنادیے جاتے ہیں، علی پلھ نے جو جرم کیا وہ ہم سب کریں گے، ہم سب اس نہر پر جاکر ویڈیو بنائیں گے، پانی چوروں کی لسٹ جاری کررہے ہیں، یزیدوں کا ٹولا سندھ پر حکمران ہے۔

انہوں نے مزید کہا کہ سندھ میں پانی روکنے والوں کو بے نقاب کریں گے، میرے حلقے میں پانی مراد علی شاہ نے بند کردیا ہے، یہ امام حسین علیہ سلام کی نہیں یزید کی اولاد ہے۔

پی ٹی آئی کے رہنما نے کہا کہ سندھ حکومت کا ویکسین کے حوالے سے الزام شرمناک ہے، ایک بھی ویکسین سندھ حکومت نے نہیں خریدی، سارا سامان وفاق نے دیا ہے۔

حلیم عادل شیخ نے کہا کہ سندھ میں پولیس گردی بڑھ گئی ہے، مردم شماری ہم نے دوبارہ کرانے کا مطالبہ کیا ہے، سندھ میں مزید تقسیم نہیں چاہتے۔

انہوں نے یہ بھی کہا کہ بحریہ ٹاؤن آصف زرداری کا پروجیکٹ ہے۔