وفاقی وزیر اطلاعات فواد چوہدری نے کہا کہ نظر نہیں آرہا کہ سندھ میں بجٹ کا پیسہ کہاں جاتاہے۔

تفصیلات کے مطابق وفاقی وزیر اطلاعات فواد چوہدری نے کہا کہ آصف زرداری نے پیپلزپارٹی کوسندھی قوم پرست پارٹی بنادیاہے ، سندھ کوبلدیاتی نظام کی بہت زیادہ ضرورت ہے ، کراچی کی عوام سندھ حکومت سےتنگ ہے۔

انہوں نے کہا کہ ہمیں کراچی کےمسائل کاادراک ہے ، کراچی کے لوگ شکوہ کرتے ہیں کہ ہمارے مسائل حل نہیں ہوئے ، سندھ میں سڑکوں کا براحال ہے ، اسپتالوں میں سہولیات کا فقدان ہے ، گھوٹکی اوربدین کے حالات سب کےسامنےہیں۔

وفاقی وزیر اطلاعات نے کہا کہ تیل،گیس ریئلٹی کی مدمیں سب سےزیادہ پیسہ گھوٹکی کوملتاہے ، لیکن گھوٹکی میں بھی ترقی کے کوئی اثار نہیں ، کراچی ملک کا صنعتی مرکز ہے۔

فواد چوہدری نے کہا کہ اگرسندھ میں پی ٹی آئی کی حکومت ہوتی تو نمایاں ترقی نظرآتی ، آرٹیکل 140اےپرعملدرآمدنہیں ہورہا ،  حکومتی پالیسیوں کی وجہ سے زرعی شعبے میں ترقی ہوئی۔

انہوں نے کہا کہ ٹریکٹر کی فروخت میں 64 فیصد اضافہ ریکارڈ کیاگیا ، کھاد اور موٹرسائیکلوں کی فروخت میں اضافہ ہورہا ہے ، امیدہے سندھ حکومت اس سال کچھ پیسہ عوام پر لگائےگی۔

وفاقی وزیر اطلاعات نے کہا کہ سندھ حکومت ابھی تک پولیس کو ضروری سازوسامان نہیں دےسکی ، اگلا سال پاکستان کی ترقی اورخوشحالی کاسال ہوگا ، پاکستان میں جدیدترین میڈیا یونیورسٹی بنانے جارہےہیں۔