وزیر اعظم عمران خان سے پی ٹی آئی رکن سندھ اسمبلی ملک شہزاد اعوان نے اسلام آباد میں ملاقات کی ہے۔

ملاقات میں ملک شہزاد اعوان نے وزیراعظم کو بلدیہ ٹاؤن میں 2018 کے بعد ہونے والے ترقیاتی منصوبوں اور مستقبل قریب کے ترقیاتی منصوبوں سے آگاہ کیا ہے۔

اس موقع پر وزیراعظم نے حلقے میانوالی کے جو لوگ کراچی میں رہتے ہیں ان کے لئے بھی خصوصی پیکج اور ٹرانسپورٹرز کے مسائل سے بھی آگاہ کیا۔

ملک شہزاد نے عمران خان سے بلدیہ ٹاؤن کے لئے مزید ترقیاتی منصوبوں کی درخواست کی ہے۔

انہوں نے کہا کہ وزیراعظم نے میری درخواست قبول کی اور بلدیہ ٹاؤن میں تین ارب کے مزید ترقیاتی منصوبوں کی یقین دہانی کروائی ہے۔

پی ٹی آئی رکن سندھ اسمبلی کا کہنا تھا کہ اپنے حلقے بلدیہ ٹاؤن کے مکینوں کی جانب سے اور ذاتی حیثیت میں بھی وزیراعظم عمران خان کا مشکور ہوں۔

شہزاد اعوان نے یہ بھی کہا کہ میں بلدیہ ٹاؤن کا بیٹا ہوں بلدیہ کے لوگوں نے مجھے منتخب کیا، میں اپنا حق ادا کرنا چاہتا ہوں۔

انہوں نے کہا کہ یہ فنڈ بلدیہ ٹاؤن میں لگنا شروع ہوجائے گا۔

ملاقات میں وزیراعظم کو ٹرانسپورٹرز کو درپیش مسائل سے بھی آگاہ کیا۔

اس دوران وزیراعظم نے گورنر سندھ عمران اسماعیل کو ٹرانسپورٹرز کے مسائل کو ترجیحی بنیادوں پر حل کرنے اور بھرپور اقدامات اٹھانے کا کہا ہے۔

پی ٹی آئی رکن سندھ اسمبلی کا کہنا تھا کہ ٹرانسپورٹرز حضرات سب سے زیادہ ٹیکس دیتے ہیں اور ٹرانسپورٹرز کو مسائل بھی سب سے زیادہ درپیش ہیں۔

شہزاد اعوان نے یہ بھی کہا کہ میانوالی عمران خان کے حلقے این اے 95 سے تعلق رکھنے والے جو لوگ کراچی میں بستے ہیں ان کے لئے بھی وزیراعظم سے خصوصی پیکیج مانگا ہے۔

انہوں نے کہا کہ وزیراعظم صاحب نے مجھے پابند کیا ہے کہ میانوالی کی جتنی بھی قومیں کراچی میں رہتی ہیں ان سے رابطے میں رہو۔

ملک شہزاد کا کہنا تھا کہ عمران خان کی سربراہی میں ملک ایک درست سمت میں چل پڑا ہے۔

شہزاد اعوان نے کہا کہ وزیراعظم کے تعاون سے پہلے بھی بلدیہ ٹاؤن میں ریکارڈ ترقیاتی کام کروائے، اور اب بھی وزیراعظم کے تعاون سے مزید ریکارڈ کام کروائے جائیں گے۔

پی ٹی آئی رکن سندھ اسمبلی ملک شہزاد اعوان کا مزید کہنا تھا کہ میں وزیراعظم عمران خان کا بے حد مشکور ہوں کہ انہوں نے بلدیہ ٹاؤن، ٹرانسپورٹرز اور میانوالی برادری کے مسائل سنے اور ان کا باقاعدہ حل نکالا۔