قومی وائیٹ بال کرکٹ ٹیم کے نائب کپتان شاداب خان کا کہنا ہے کہ مثبت سوچ کے ساتھ انگلینڈ آئے ہیں۔

تفصیلات کے مطابق شاداب خان نے ڈربی میں ٹریننگ سیشن کے بعد گفتگو کرتے ہوئے کہا کہ انگلینڈ کے خلاف سیریز کے لئے بہت پر جوش ہوں، جلد از جلد کنڈیشنز سے ہم آہنگی کی کوشش کر رہے ہیں۔

[amazonad category=”Auto”]

شاداب خان کا کہنا تھا کہ انگلینڈ میں موسم تبدیل ہو جائے تو گیند سیم ہونے لگتا ہے جبکہ سورج نکل آئے تو یہاں کا موسم ون ڈے اور ٹی ٹونٹی کے لئے موزوں ہوتا ہے۔

انہوں نے کہا کہ پہلا ٹریننگ سیشن شاندار رہا، انگلینڈ کی ٹیم ورلڈ کپ چیمپئن ہے اور وائیٹ بال کرکٹ کی بہت اچھی ٹیم ہے۔

انہوں نے کہا کہ گزشتہ دورہ انگلینڈ میں اچھی پرفارمنس رہی ہے اس مرتبہ بھی بہتر کھیل پیش کرنے کی کوشش کریں گے ، ٹی ٹونٹی ورلڈ کپ سے پہلے انگلینڈ کے خلاف سیریز تیاری کا اچھا موقع ہے۔

شاداب خان کا کہنا تھا کہ مکمل فٹ ہوچکا ہوں، باؤلنگ پر خاص توجہ دے رہا ہوں۔

شاداب خان نے مزید کہا کہ میری پہلی ترجیح باؤلنگ ہی ہے، کوشش ہے کہ پاکستان کے لئے زیادہ سے زیادہ آؤٹ کر سکوں، اگلے چند ماہ ہمیں مسلسل کرکٹ کھیلنی ہے اس لئے ٹرینر نے ابھی فٹنس ٹیسٹ کا بھی اہتمام کیا ہے،  پریکٹس سیشنز میں فزیکل  ٹریننگ پر توجہ مرکوز ہے تاکہ فٹنس ٹیسٹ کی بھی تیاری ہو سکے۔