وزیر مملکت برائے اطلاعات و نشریات  فرخ حبیب نے بلاول زرداری کے بیان پر ردعمل کیا ہے۔

تفصیلات کے مطابق وزیر مملکت برائے اطلاعات و نشریات  فرخ حبیب نے کہا ہے کہ حکومت کی بہترین معاشی کارکردگی دیکھ کر بوکھلاہٹ کا شکار بلاول اب جھوٹے معاشی اعدادو شمار کا سہارا لے رہے ہیں۔

 انہوں نے کہا کہ بلاول زرداری بتائیں کہ تیسری مرتبہ سندھ میں حکومت کر رہے ہیں،کراچی سمیت پورے سندھ میں سب سے ذیادہ مہنگائی ہے اسے کم کرنے کے لئے آج تک کیا کیا ہے؟

کراچی کے عوام کو مافیا کے رحم و کرم پر چھوڑ دیا گیا، سندھ کے عوام غریب سے غریب تر اور بلاول کا خاندان امیر سے امیر تر ہوگیا ہے۔ بلاول اور انکے خاندان کی پہچان اومنی گروپ، منی لانڈرنگ اور جعلی اکاؤنٹس بن چکی ہے۔

 وزیر مملکت نے کہا کہ وزیراعظم عمران خان کی خصوصی ہدایات پر احساس ایمرجنسی کیش پروگرام  کے تحت 23لاکھ 98ہزار خاندانوں میں 28ارب 9کروڑ 87لاکھ روپے دیئے گئے، فی خاندان کو 12ہزار روپے دیے گئے ہیں، احساس ایمرجنسی کیش کے مجموعی فنڈز کا تقریبا35فیصد سندھ کے عوام کو دیا گیا ہے۔

 انہوں نے کہا کہ رواں مالی سال میں فی کس آمدن 2لاکھ 46ہزار 414روپے ہے جو گذشتہ سال کی نسبت 14.6فیصد زائد ہے۔

فرخ حبیب نے کہا کہ لارج سکیل مینوفیکچرنگ میں 9فیصد، سیمنٹ کی سیل میں 40فیصد اور گاڑیوں کی سیل میں 54فیصد اضافہ ہوا ہے۔ ملک کی مجموعی معاشی شرح نمو میں 33بلین ڈالر کا اضافہ ہوا ہے اور روشن ڈیجیٹل اکاؤنٹ کو اووسیز پاکستانیوں میں پذیرائی حاصل ہوئی ہے۔

وزیر مملکت برائے اطلاعات و نشریات نے کہا کہ درآمدات کا حجم 231بلین ڈالر ، سیلز ٹیکس وصولیوں میں 28فیصد، کسٹم ڈیوٹی میں 18فیصد اور فیڈرل ایکسائز ٹیکس میں 11.5فیصد اضافہ  ہوا ہے۔

  فرخ حبیب نے یہ بھی کہا کہ رشکئی ،ایم ون نوشہرہ ، علامہ اقبال خصوصی اقتصادی زون اور بلوچستان کے خصوصی زونزسے روزگار کے 10 لاکھ بلواسطہ مواقع پیدا ہوں گے۔ ان معاشی سرگرمیوں سے نہ صرف بے روگاری کی شرح میں کمی ہوگی بلکہ پاکستان میں صنعتی ترقی،پائیدار اقتصادی شرح نمو کے حصول میں مدد ملے گی۔