وزیراعظم عمران خان نے کہا ہے کہ راولپنڈی میں لئی بزنس ڈسٹرکٹ منصوبے اور گوجرانوالہ میں ترقیاتی منصوبوں سے معاشی سرگرمیوں میں اضافہ ہوگا۔

تفصیلات وزیر اعظم عمران خان کی زیر صدارت قومی رابطہ کمیٹی برائے ہاؤسنگ، تعمیرات و ترقی کا اجلاس ہوا جس میں راولپنڈی لئی بزنس ڈسٹرکٹ منصوبے کے بارے میں شرکاء کو تفصیلی بریفنگ دی گئی۔

[amazonad category=”Auto”]

مشیر وزیر اعلیٰ پنجاب ڈاکٹر سلمان شاہ نے اجلاس کو آگاہ کیا کہ اس منصوبے سے راولپنڈی نالہ لئی کے دونوں اطراف ایکسپریس وے کی تعمیر، نالہ لئی کی صفائی اور اطراف میں بزنس ڈسٹرکٹ کی تعمیر شامل ہیں۔

ڈاکٹر سلمان شاہ نے کہا کہ اس منصوبے کے تحت مجوزہ بزنس ڈسٹرکٹ سے کثیر معاشی فوائد کا تخمینہ لگایا گیا ہے۔

مشیر وزیر اعلیٰ پنجاب ڈاکٹر سلمان شاہ نے مزید کہا کہ اس منصوبے کی بدولت سیلابی صورتحال سے شہریوں کی جان و مال کا تحفظ ممکن ہو سکے گا جبکہ یہ منصوبہ پبلک پرائیویٹ پارٹنرشپ ماڈل کے تحت چلایا جائے گا جس میں حکومت صرف اراضی فراہم کرے گی۔

چیف سیکرٹری پنجاب نے اجلاس کو گوجرانوالہ ڈویلپمنٹ پلان پر بریفنگ دی۔

بریفنگ دیتے ہوئے کہا گیا کہ گوجرانوالہ کے لئے مالی سال 22-2021 صوبائی اور وفاقی ترقیاتی پروگرام میں 40 منصوبے شامل کئے گئے ہیں جن میں زراعت، صنعت، سڑکوں کی تعمیر و مرمت، ماحولیاتی تحفظ، پینے کا پانی اور سیوریج شامل ہیں۔

اجلاس کی صدارت کرتے ہوئے وزیر اعظم عمران خان نے دونوں منصوبوں کی افادیت کو اجاگر کرتے ہوئے کہا کہ ان سے معاشی سرگرمیوں میں اضافہ ہوگا اور شہریوں کو براہ راست فوائد حاصل ہوں گے۔

عمران خان نے کہا کہ منصوبہ بندی کو موثر بنانے کے لئے پرائیوٹ سیکٹر کے ماہرین سے رائے لی جائے اور منصوبوں سے بہترین معاشی فوائد حاصل کرنے کے لئے متبادل پلان بنائے جائیں۔

وزیر اعظم عمران خان نے مزید کہا کہ سرکاری اراضی واگزار کرانے کو ترجیح دی جائے، منصوبوں سے متعلق اہداف کو مقررہ اور طے شدہ مدت کے اندر مکمل کیا جائے۔

اجلاس میں وزیر مملکت برائے اطلاعات و نشریات فرخ حبیب ،معاونین خصوصی ملک امین اسلم، ڈاکٹر شہباز گل، چیئرمین نیا پاکستان ہاؤسنگ و ڈویلپمنٹ اتھارٹی لیفٹیننٹ جنرل (ر) انور علی حیدر اور سینئر افسران نے شرکت کی جبکہ ویڈیو لنک کے ذریعے وزیر ہاؤسنگ پنجاب میاں محمود الرشید، مشیر ڈاکٹر سلمان شاہ اور چیف سیکرٹری پنجاب بھی شریک تھے۔