وزیراعلیٰ پنجاب کے معاون خصوصی سردار تنویر الیاس خان نے کہا ہے کہ عمران خان نے خود کو کشمیریوں کا سفیر کہا ہے۔

تفصیلات کے مطابق وزیراعلیٰ پنجاب کے معاون خصوصی سردار تنویر الیاس خان نے اپنے ایک بیان میں کہا کہ آزاد کشمیر کے عوام عمران خان کو اپنا مسیحا سمجھتے ہیں۔

سردار تنویر الیاس خان نے کہا کہ عمران خان نے خود کو کشمیریوں کا سفیر کہا ہے، پی ٹی آئی آزاد کشمیر میں تعمیر و ترقی کے نئے دور کا آغاز کرے گی۔

وزیر اعلیٰ پنجاب کے معاون خصوصی نے یہ بھی کہا کہ عمران خان نے جرات کے ساتھ پوری دنیا میں مسئلہ کشمیر کو اجاگر کیا جبکہ عمران خان واحد لیڈر جس نے بھارتی مظالم کو دنیا کے سامنے بے نقاب کیا۔

سردار تنویر الیاس خان کا کہنا تھا کہ آزاد کشمیر میں پی ٹی آئی ن لیگ پیپلزپارٹی کو الیکشن میں کلین بولڈ کرےگی جبکہ عمران خان کی قیادت میں پی ٹی آئی دو تہائی اکثریت سے حکومت بنائے گی۔

وزیر اعلیٰ پنجاب کے معاون خصوصی کا یہ بھی کہنا تھا کہ بلاول بھٹو آزاد کشمیر میں اچھل کود کر رہے ہیں، بلاول بھٹو کی نابالغ سیاست کشمیر کاز کے لیے نقصان دہ ہے۔

سردار تنویر الیاس خان نے کہا کہ مسئلہ کشمیر ایک حساس ترین مسئلہ ہے، بلاول بھٹو تنازعہ کشمیر جیسے حساس مسئلہ پر گفتگو سے اجتناب کریں۔

وزیر اعلیٰ پنجاب کے معاون خصوصی سردار تنویر الیاس خان نے مزید کہا کہ بلاول بھٹو مسئلہ کشمیر پر سیاست نہ چمکائیں، پیپلز پارٹی نے ہمیشہ کشمیریوں کے ساتھ غداری کی اور مسئلہ کشمیر کو پر دوغلی پالیسی رکھی۔