کورونا لاک ڈاؤن کے دوران اسکول بند ہونے کے باعث بچے گھروں میں محدود ہوتے ہیں اور اس دوران بچے گیمز کھیلتے ہیں جس کے سبب ان کی نظر کمزور ہونے لگیں ہیں۔

تفصیلات کے مطابق بچوں پر کی گئی ایک تحقیق میں معلوم ہوا ہے کہ لاک ڈاؤن کے دوران گھروں تک محدود رہنے والے بچوں میں نظروں کی کمزوری بالخصوص دور کی چیزیں دیکھنے کی صلاحیت متاثر ہوتی ہے۔

بچوں میں نظر کی کمزوری کی وجہ یہ بتائی گئی ہے کہ یہ بچے گھر میں بند رہنے کی وجہ سے اپنا زیادہ تر وقت ٹی وی یا پھر ویڈیو گیمز کھیل کر گزارتے ہیں۔

ہانگ کانگ میں کی جانے والی اس تحقیق میں 1793 بچے شریک ہوئے، جہاں ان کی دیکھنے کی صلاحیت کو جانچا گیا اور ان بچوں نے اپنے لائف اسٹائل کے حوالے سے دئیے گئے ایک سوالنامے کو پُر کیا۔

یہ تحقیق کرنے والے سائنسدانوں نے سات سو بچوں کو عالمی وباء کے آغاز میں تحقیقی مقصد کے لئے بھرتی کیا تھا جبکہ بقیہ بچوں کی پہلے ہی سے تین سالہ مانیٹرنگ کی جارہی تھی۔

تحقیق کے مرکزی مصنف کے مطابق ابتدائی نتائج سے یہ خطرناک صورتحال سامنے آئی کہ دور کی نظروں کی خرابی کافی زیادہ ہے اور اس حوالے سے مناسب اقدامات کی ضرورت ہے۔

ماہرین کا کہنا ہے کہ باہر نہ جانے اور گھر میں ٹی وی، کمپیوٹر اور ویڈیو گیمز کے استعمال کی وجہ سے ان کی دور کی نظر دھندلے پن کا شکار ہوجاتی ہے۔