وزیر اعظم عمران خان نے کہا ہے کہ ملک کے نوجوانوں کو روزگار فراہم کرنا حکومت کی اولین ترجیح ہے۔

تفصیلات کے مطابق وزیر اعظم عمران خان سے علاقائی ورلڈ بینک جنوبی ایشیاء کے نائب صدر ہارٹ وِگ شکافر کی ملاقات ہوئی جس میں پاکستان کی معاشی صورتحال پر گفتگو کی گئی۔

ملاقات میں کورونا کے باوجود مثبت معاشی اعشاریوں، گردشی قرضوں میں خاطر خواہ کمی اور بڑھتی ہوئی برآمدات پر گفتگو کی گئی جبکہ ایس ڈی جیز کے ذریعے کسانوں کی آسان قرضوں سے معاونت و منڈیوں تک بنیادی ڈھانچے کی بہتری کے ذریعے رسائی پر بھی بات چیت کی گئی۔

اس موقع پر آئی ایم ایف پروگرام، معاشی شعبے میں اصلاحات کے ذریعے سب سے کم اضافے اور معاشی ترقی میں تمام طبقوں کو ساتھ لے کر چلنے کی پالیسی پر گفتگو کی گئی جبکہ انضمام شدہ اضلاع کے لوگوں کی ترقی کیلئے اٹھائے اقدامات، ماحولیاتی آلودگی کے سدباب جس میں جنگلات کی بھالی، بلین ٹری سونامی پر بھی تبادلہ خیال کیا گیا۔

ملاقات میں آپٹیکل فائیبر سے مواصلات کے نظام میں بہتری ، لاک ڈاؤن میں تعلیمی سرگرمیوں کو فعال رکھنے میں معاونت جیسے معاملات زیر غور آئے۔

ورلڈ بینک جنوبی ایشیاء کے نائب صدر نے وزیراعظم کو بریفنگ دیتے ہوئے کہا کہ پاکستان موجودہ ٹیکس دہندگان پر مزید بوجھ ڈالنے کی بجائے معاشی ترقی کی پالیسی اپنا رہا ہے، روزگار کے مواقع پیدا ہونگے بلکہ ملکی ریونیو بھی بڑھےگا اور لوگوں کی آمدن میں اضافہ ہوگا۔

 ہارٹ وِگ شکافر نے کہا کہ پاکستان میں عالمی بینک متعدد منصوبوں پر کام کر رہا ہے، عالمی بینک بلکہ پوری دنیا پاکستان کے احساس پروگرام کی تخفیفِ غربت و سماجی تحفظ کے حوالے سے معترف ہے اور مثالیں دیتی ہے۔

ورلڈ بینک جنوبی ایشیاء کے نائب صدر کا کہنا تھا کہ حکومت کی معاشی اصلاحات اور  کورونا کے دوران سمارٹ لاک ڈاؤن کی پالیسی بھی قابلِ تحسین ہیں، ورلڈ بینک پاکستان میں سماجی تحفظ کے منصوبوں میں بھی پوری معاونت میں دلچسپی رکھتا ہے۔

ہارٹ وِگ شکافر کا یہ بھی کہنا تھا کہ احساس پروگرام تخفیفِ غربت و سماجی تحفظ کا دنیا بھر میں منفرد اور بڑا پروگرام ہے، پروگرام کی بین الاقوامی سطح پر مثالیں دی جا رہی ہیں۔امید ہے کامیاب پاکستان پروگرام بھی اسی طرز کا ایک مثالی پروگرام ہوگا۔

ورلڈ بینک جنوبی ایشیاء کے نائب صدر ہارٹ وِگ شکافر کا مزید کہنا تھا کہ عالمی بینک اور پاکستان کا ملک کی عوام کی خوشحالی اور ترقی کیلئے تعاون جاری رہے گا۔

ملاقات میں وزیرِ اعظم عمران خان نے عالمی بینک کے پاکستان کے ساتھ مشکل وقت میں تعاون پر شکریہ ادا کیا۔

عمران خان نے کہا کہ حکومت معاشی ترقی سے اس ملک کے نوجوانوں کو روزگار فراہم کرنے کو بھی اپنی اولین ترجیح سمجھتی ہے۔

وزیرِ اعظم کا کہنا تھا کہ حکومت کوشش کر رہی ہے کہ عوام پر بوجھ کم کرکے ریلیف فراہم کیا جائے، بد قسمتی سے اس وقت پوری دنیا میں اشیاء کی قیمتوں میں 40 فی صد تک اضافہ ہوا ہے۔

عمران خان کا یہ بھی کہنا تھا کہ حکومت کی اولین ترجیحات میں سے ایک معاشی طور پر کمزور طبقے کو تحفظ فراہم کرنا ہے، کامیاب پاکستان منصوبے کا جلد افتتاح کر دیا جائے گا۔

وزیرِ اعظم عمران خان کا مزید کہنا تھا کہ کامیاب پاکستان کسانوں کو معاونت، سستی رہائش کی فراہمی اور کاروبار میں آسانی کیلئے آسان شرائط پر قرض فراہم کرے گا۔

ملاقات میں کنٹری ڈائیریکٹر عالمی بینک ، وفاقی وزراء شوکت فیاض ترین، عمر ایوب، گورنر سٹیٹ بینک رضا باقر اور متعلقہ اعلیٰ افسران نے شرکت کی۔