وزیراعظم کا کہنا ہےکہ پاکستان کو افغان جنگ کے نتائج کا ذمہ دار قرار دینا درست نہیں۔ 

تفصیلات کے مطابق وزیراعظم عمران خان کا واشنگٹن پوسٹ میں مضمون شائع ہوا ہے ، جس میں انہوں نے افغانستان کی موجودہ صورتحال کے حوالے سے لکھا ہےکہ پاکستان کو افغان جنگ کے نتائج کا ذمہ دار قرار دینا درست نہیں، تین لاکھ افغان فوج کے ہتھیار ڈالنے کا الزام ہم پرکس طرح دیا جا سکتا ہے۔

 وزیراعظم نے اپنے مضمون میں لکھا کہ حقیقت تسلیم کرنے کے بجائے مغربی ممالک اور بھارت پاکستان پر مسلسل الزام تراشیوں میں مصروف ہیں ، امریکی کانگریس میں افغانستان میں امریکی نقصان کا تعلق پاکستان سے جوڑنا حیرت انگیز ہے۔

ان کا کہنا ہےکہ میں 2001 سے کہتا آرہا ہوں کہ افغانستان کو فتح کرنا ممکن نہیں ، ماضی میں حکومتوں نے افغان معاملے پر امریکا کی خوشنودی حاصل کرنے کی کوشش کی ، نائن الیون کے بعد مجاہدین راتوں رات دہشتگرد بن گئے۔

 وزیراعظم نے کہاکہ امریکا کی جنگ کی حمایت پر جنگجوؤں نے پاکستان کے خلاف محاذ کھول دیا ، ہم نے اپنی بہترین فوج کے ذریعے اپنے دفاع میں دہشتگردی کو شکست دی ، افغانوں نے نائن الیون کے بعد افغانستان میں حکومتوں کو تسلیم نہیں کہا ، یہی وجہ ہے کہ کسی نے افغان حکومت کے حق میں آواز نہیں اٹھائی۔

 وزیراعظم عمران خان نے مزید کہاکہ پاک افغان بارڈر پر حفاظتی باڑکے اخراجات ہم نے اٹھائے، ہمیں بلیم گیم کے بجائے افغانستان کے مستقبل کے بارے میں سوچنا ہے۔

دوسری جانب آج وزیراعظم عمران خان نے کراچی سرکلر ریلوے کا سنگ بنیاد رکھنے کی افتتاحی تقریب سے خطاب کرتے ہوئے کہاکہ کراچی 1970 میں کیا تھا سب جانتے ہیں، کراچی میں انتشار کے بعد اس کی ترقی تیزی سے گرنا شروع ہوگئی ،کراچی معیشت کےحوالے سے اہم شہر ہے۔

وزیراعظم نے کہاکہ کے سی آر منصوبے پر وزیراعلیٰ سندھ مراد علی شاہ اور گورنر عمران اسماعیل کی معاونت کے مشکورہیں ، کراچی کے مسائل کے حل کےلیے وفاقی حکومت پرعزم ہے۔

انہوں نے کہاکہ بدقسمتی سے کراچی میں ٹرانسپورٹ کا جونظام ہونا چاہیے تھا نہیں بنا، اس کے بعد کراچی میں پانی دوسرا بڑا مسئلہ ہے، کراچی کے دیگر مسائل کے حل کے لیے وفاقی اورصوبائی حکومت کومل کر چلنا ہوگا، کراچی کوپھیلنے سے روکنے کیلئے پلاننگ کرنا ہوگی۔

وزیراعظم عمران خان نے کہاکہ ہمیں سندھ کی ترقی کے لیے آگے بڑھنا ہوگا اور ساتھ چلنا ہوگا۔

انہوں نے کہاکہ کراچی کے انفرااسٹرکچرپرتوجہ نہیں دی گئی ، کراچی کے 3 بڑے نالوں پرکام کےآغازپرخوشی ہوئی، کراچی کےمسائل بروقت حل نہ کیے توکنٹرول کرنامشکل ہوجائیگا، کراچی میں 2 سال کے دوران کے فورمنصوبہ مکمل ہوجائےگا، کےفورمنصوبے سے کراچی میں پانی کا مسئلہ ختم ہوجائےگا، کراچی میں دنیا بھرسے سرمایہ کاری ہوسکتی ہے۔

وزیراعظم عمران خان نے کہاکہ وزیراعلیٰ سندھ بنڈل آئی لینڈ منصوبے پرنظرثانی کریں، بنڈل آئی لینڈ سے سندھ حکومت کوہی فائدہ ہوگا، بنڈل آئی لینڈ میں بیرون ملک سے سرمایہ کاری آئے گی، سندھ  کی ترقی کے لیے آگے بڑھنا اور ساتھ چلنا ہوگا۔

کراچی سرکلر ریلوے ڈھائی سو ارب روپے کی کثیر لاگت سے مکمل کیا جائے گا۔

ذرائع کے مطابق کراچی سرکلر ریلوے کی افتتاحی تقریب میں وزیر ریلوے اعظم سواتی ، وزیر اطلاعات فواد چوہدری اور وفاقی وزیر برائے منصوبہ بندی اسد عمر بھی وزیراعظم عمران خان کے ہمراہ مو جود ہیں۔