پاک فضائیہ کے سربراہ ایئر چیف مارشل ظہیر احمد بابر سدھو کا کہنا ہے کہ پاکستان اور عراق کے مابین دیرینہ مذہبی، ثقافتی اور تاریخی رشتہ قائم ہے۔

تفصیلات کے مطابق ترجمان پاک فضائیہ کا کہنا ہے کہ عراقی فضائیہ کے نائب سربراہ نے سربراہ پاک فضائیہ سے ملاقات کی، ملاقات میں پیشہ ورانہ اور باہمی دلچسپی کے امور پر تبادلہ خیال کیا گیا۔

عراقی فضائیہ کے نائب سربراہ میجر جنرل (پائلٹ) محمد مجید مہدی محمود نے کہا کہ پاک فضائیہ کی پیشہ ورانہ مہارت اور خود انحصاری کے میدان میں ہونے والی غیر معمولی پیشرفت قابلِ تعریف ہے۔

سربراہ پاک فضائیہ نے کہا کہ پاکستان اور عراق کے مابین دیرینہ مذہبی، ثقافتی اور تاریخی رشتہ قائم ہے، عراقی فضائیہ کی حربی ضروریات پوری کرنے کے لئے پاک فضائیہ تربیتی اور ٹکنیکی شعبوں میں تعاون جاری رکھے گی۔

ملاقات میں دونوں سربراہان نے جے ایف 17 پروگرام سمیت دیگر شعبوں میں بھی تعاون کو مزید فروغ دینے پر اتفاق کیا۔

ترجمان پاک فضائیہ کے مطابق ملائشیا، نائیجیریا، ارجنٹینا کے بعد عراق بھی جے ایف 17 تھنڈر فیملی میں شامل ہونے جا رہا ہے، عراقی فضائیہ کے نائب سربراہ کے دورے میں اس حوالے سے اہم پیش رفت ہوئی۔