وزیراعلیٰ سندھ مراد علی شاہ کو فرد جرم عائد کرنے کیلئے نیب نے طلب کرلیا ہے۔

تفصیلات کے مطابق احتساب عدالت نے نوری آباد پلانٹ کے غیر قانونی ٹھیکوں اور منی لانڈرنگ ریفرنس میں وزیراعلیٰ سندھ مراد علی شاہ کو فرد جرم عائد کرنے کیلئے 7 اکتوبر کو طلب کرلیا ہے۔

ذرائع  کے مطابق احتساب عدالت میں نوری آباد پلانٹ کے غیر قانونی ٹھیکوں اور منی لانڈرنگ ریفرنس پر سماعت ہوئی ، وزیر اعلیٰ سندھ مراد علی شاہ ،عبدالغنی مجید، خورشید انور سمیت 17 ملزمان پر فرد جرم عائد کرنے کیلئے7 اکتوبر کو طلب کرلیا گیا۔

عدالت کا کہنا تھا کہ مراد علی شاہ سمیت ملزمان پر آئندہ سماعت 7 اکتوبر کو فرد جرم عائد ہوگی۔

واضح رہے نیب نے وزیراعلیٰ سندھ مراد علی شاہ کیخلاف 1لاکھ صفحات اور66 والیمز پر مشتمل ریفرنس دائر کررکھا ہے۔

نیب ریفرنس میں وزیراعلیٰ سندھ کے خلاف توانائی منصوبوں پر خلاف ضابطہ فنڈز جاری کرنے اور سندھ میں توانائی منصوبوں میں اختیارات کے غلط استعمال کا الزام عائد کیا گیا تھا۔

نیب ریفرنس میں کہا گیا تھا کہ سندھ میں توانائی منصوبوں میں خلاف ضابطہ فنڈز جاری کیے گئے، نوری آباد پاور کمپنی، سندھ ٹرانسمیشن اینڈڈسپیچ کمپنی میں بھی اربوں کی ہیرپھیر کی گئی ہے۔

دوسری جانب اسلام آباد میں مسلم لیگ ن کے رہنما، سابق وزیرِ اعظم شاہد خاقان عباسی نے پریس کانفرنس کے دوران کہا کہ ملک میں کوئی ایسا وزیر نہیں جو کرپٹ نہ ہو، عوام خود دیکھ لیں کہ ملک میں کون کرپٹ ہے اور کون نہیں۔

ان کا کہنا تھا کہ جب سے کیس چلے ہیں، گیس کی قیمتوں میں واضح اضافہ ہوا ہے، حکومت کی نا اہلی کی وجہ سے نظام بیٹھ چکا ہے۔

شاہد خاقان عباسی نے مزید کہا کہ معیشت کے حوالے سے تمام دعوے ختم ہو گئے ہیں، روز جھوٹ بولنے والے بھی اب نہیں رہے۔ عوام بے روزگاری اور غربت میں پس رہے ہیں۔