وفاقی وزیر اطلاعات فواد چوہدری نے کہا ہے کہ نیوزی لینڈ اور انگلینڈ کے دورے منسوخ ہونے سے پاکستان ٹیلیویژن کو 25 کروڑ روپے کا نقصان ہوا۔

تفصیلات کے مطابق وفاقی وزیر اطلاعات فواد چوہدری نے کہا ہے کہ کرکٹ واحد کھیل ہے جو قوم کو جوڑتا ہے ، اگر کوئی ایک چیز جو کراچی سے گوادر تک قوم کو ایک کرتی ہے تو وہ کرکٹ ہے۔

وفاقی وزیر اطلاعات فواد چوہدری نے کہا ہے کہ کرکٹ ٹیمز کے دورے پاکستان میں بہت زیادہ اثر ڈالتے ہیں ، وزیراعظم دشمبے میں تھے جب نیوزی لینڈ کے دورہ منسوخ ہونے کی خبر آئی۔

اس سے قبل وفاقی وزیر اطلاعات فواد چوہدری نے میڈیا سے گفتگو کرتے ہوئے کہا تھا کہ پی ٹی آئی کا پارلیمانی پارٹی اجلاس جاری ہے ، بابر اعوان نے انتخابی اصلاحات پر بریفنگ دی ہے۔

انہوں نے کہا تھا کہ انتخابی اصلاحات مشترکہ اجلاس میں پیش کریں گے ، اپوزیشن سے بات جاری رہے گی لیکن وقت کی کمی ہے ، مشترکہ اجلاس بلائیں گے ، وزیرخزانہ شوکت ترین کو سینٹ کا رکن بنایا جائے گا ، شہباز شریف نے طویل پریس کانفرنس کی ہے ، اپنے اوپر الزامات کا کوئی جواب نہیں دیا ، شریف فیملی کا جھوٹ ان کا وطیرہ بن چکا ہے۔

وفاقی وزیر اطلاعات فواد چوہدری نے کہا تھا کہ دودن پہلے فیک نیوز چلائی گئی  ، لندن کی نیشنل کرائم ایجنسی نے اپنے طور پر معاملہ چلایا ، شہزاداکبر کے یونٹ سے بھی مدد مانگی گئی تھی۔

فواد چوہدری نے کہا تھا کہ شہباز شریف پر دومقدمات پاکستان میں ہیں ، ایک مقدمہ شہبا شریف اور نصرت شہباز کے خلاف سات ارب 29 کروڑ کا ہے ، یہ مقدمات روزمرہ کی بنیاد پر نہیں چل رہے ، پاکستان کی عدالتوں کو یہ مقدمہ روزانہ کی بنیاد پر چلانے چاہئیں۔

انہوں نے کہا تھا کہ دوسرا کیس 25 ارب کا شوگر ملز کا ہے ، رمضان شوگر ملز آرگنائزڈ منی لانڈرنگ چلارہی ہیں ، العریبیہ اور رمضان شوگرملز کے ستاون اکاؤنٹس ہیں ، العریبیہ ملز کے چپڑاسی اور فرنیچر کی دکان کے مالک حاجی نعیم کے اکاؤنٹ میں پیسہ آیا۔

وفاقی وزیر اطلاعات فواد چوہدری نے کہا تھا کہ محمد وارث کے نام پر دو ارب سے زائد روپیہ آیا ، محمد اسلم کے اکاؤنٹ میں ایک ارب 75 کروڑ آیا یہ بھی چپڑاسی ہے ، اظہر عباس کے اکاؤنٹ میں ایک ارب 60 کروڑسے زائد روپیہ آیا ، رمضان شوگر کے کلرک کے اکاؤنٹ میں بھی پیسہ آیا۔