وزیرِ صنعت و پیداوار مخدوم خسرو بختیار کا کہنا ہے کہ پاکستان میں چھوٹے و درمیانے درجے کے کاروبار کو بڑھانے کیلئے اقدامات کیے جا رہے ہیں۔

تفصیلات کے مطابق تاجیک سفیر کی وزیرِ صنعت و پیداوار مخدوم خسرو بختیار سے ملاقات ہوئی جس میں وزیراعظم پاکستان عمران خان کے ستمبر میں دورہِ تاجکستان کے حوالے سے گفتگو کی گئی۔

ملاقات کے دوران پاکستان اور تاجکستان کے مابین انڈسٹریل تعاون کے معاہدے پر تبادلہ خیال کیا گیا اور دونوں ممالک میں ٹیکسٹائل، لیدر، فوڈ پروسیسنگ، ادویات اور سرجیکل کے شعبے میں تعاون کو فروغ دینے پر بھی اتفاق کیا گیا۔

خسرو بختیار نے کہا کہ پاکستان میں چھوٹے و درمیانے درجے کے کاروبار کو بڑھانے کیلئے اقدامات کیے جا رہے ہیں، نئی ایس ایم ای پالیسی کاروباری نمو کو فروغ دے گی۔

وزیرِ صنعت و پیداوار مخدوم خسرو بختیار نے مزید کہا کہ تاجک و پاکستانی کاروباری کونسل کو قیام میں لایا جائے گا۔

دوسری جانب تاجیک سفیر نے کہا کہ انڈسٹریل تعاون معاہدہ دونوں ممالک میں تجارت بڑھانے میں معاون ثابت ہو گا، پاکستانی بزنس کمیونٹی اور کمپنیوں کو تاجکستان دورے کی دعوت دی ہے۔