ایم ڈبلیو ایم کے مرکزی رہنماء سید ناصر عباس شیرازی نے کہا ہے کہ آئین پاکستان ہر مکتبہ فکر کو مذہبی آزادی دیتا ہے۔

تفصیلات کے مطابق چہلم امام حسین ؑ کے حوالے سے مرکزی رہنماء ایم ڈبلیو ایم سید ناصر عباس شیرازی نے دیگر رہنماؤں کے ہمراہ پریس کانفرنس کی جس میں سید ناصر عباس شیرازی نے کہا کہ عزاداری سید شہداء ہماری ریڈ لائن ہے کسی قسم کی پابندی کو قبول نہیں کریں گے، آئین پاکستان ہر مکتبہ فکر کو مذہبی آزادی دیتا ہے۔

ان کا کہنا تھا کہ مختلف بہانوں سے عزاداری اور شہداء کربلا کی مجالس پر پابندی ہوتی ہے، الیکشن کروائے جاتے ہیں، دھرنے دئیے جاتے ہیں لیکن عزاداری اور مجالس پر پابندی ہوتی ہے، عالمی طاقتوں کے کہنے پر عزاداری کو محدود کرنے کی کوشش کی جا رہی ہے۔

سید ناصر عباس شیرازی نے کہا کہ ہائیکورٹ کا فیصلہ موجود ہے کہ چار دیواری کے اندر عزاداری کے لیے اجازت کی ضرورت نہیں، نئی مساجد بن رہی ہیں، مدارس بن رہے ہیں، لیکن نئے جلوسوں کی اجازت نہیں۔

ایم ڈبلیو ایم کے مرکزی رہنماء سید ناصر عباس شیرازی کا کہنا تھا کہ کئی دہائیوں سے جو جلوس جاری ہیں اب بھی وہی وقت دیا جاتا ہے اس میں تبدیلی نہیں ہو سکتی، دس سے پندرہ منٹ جلوس کے لیٹ ہونے پر کئی ایف آئی آر کاٹی گئی ہیں، کئی خطیبوں پر بہانوں سے مختلف علاقوں میں پابندیاں لگی ہوئی ہیں، علامہ شہنشاہ نقوی سمیت کئی علامہ پر مختلف علاقوں میں پابندیاں ہیں۔

انہوں نے کہا کہ مختلف پریشر گروپوں کے کہنے پر پابندی کی آڑ میں ہراساں کیا جاتا ہے، کئی علاقوں میں اہل تشیع مکتبہ فکر کے لوگوں کو بلا کر اربعین کی مجالس میں شرکت سے روکا جاتا ہے، ہم اربعین کے جلوسوں میں شریک ہونے والوں کی سیکیورٹی کا مطالبہ کرتے ہیں، چکوال، سندھ اور روالپنڈی کے کئی علاقوں میں سیکورٹی کے نام پر لوگوں کو ہراساں کیا جا رہا ہے۔

مرکزی رہنماء سید ناصر عباس شیرازی کا کہنا تھا کہ حکومت کی جانب سے رابطہ تو کیا گیا ہے لیکن وفاقی حکومت کی جانب سے سنجیدہ بات نہیں کی گئی، ایک نوٹیفیکشن جاری کیا گیا ہے جس میں آٹھ نئی چیزیں شامل کی گئی، وفاقی حکومت ایسے نوٹیفیکشن کا نوٹس لے اور ذمہ داروں کے خلاف کاروائی کریں، بانیان مجالس اور عزاداران کو شیڈول فور میں ڈالے جانے کی دھمکیاں دی جاتی ہیں۔

ایم ڈبلیو ایم کے مرکزی رہنماء سید ناصر عباس شیرازی نے مزید کہا کہ عزادار سید شہداء پر پابندیوں کو نہیں مانیں گے، کسی عسکریت پسند گروہ کے کہنے پر ایف آئی آرز کاٹی جاتی ہیں اور پابندیاں لگائی جاتی ہیں، چہلم امام حسین ایک عالمی دن ہے، 18 صفر سے اربعین کے اجتماعات شروع ہو جاتے جو 9 ربیع الاول تک جاری رہتی ہیں۔