سمندری طوفان گلاب کے باقیات کے اثرات کے حوالے سے محکمہ موسمیات نے شہر میں طوفانی بارشوں کی پیش گوئی کر دی ہے۔

تفصیلات کے مطابق سسٹم بھارتی گجرات کی جانب گامزن ہے، یہ سسٹم بحرہ عرب میں آکر دوبارہ سے تقویت حاصل کرے گا ،بحرہ عرب میں سسٹم کی موجودگی سے ساحلی پٹی سمیت سندھ میں طوفانی بارشیں متوقع ہیں ۔

محکمہ موسمیات کا اس حوالے سے کہنا ہے کہ 28 ستمبر(آج) تا 2 اکتوبر تک کراچی، حیدرآباد ، ٹھٹھہ ، بدین و دیگر علاقوں میں طوفانی بارشوں متوقع ہیں۔ اس کے علاوہ  بلوچستان میں بیلا، آوران، کھچ و دیگر میں بھی بارشیں متوقع ہیں ۔

محکمہ موسمیات کا کہنا ہےکہ 30 ستمبر تا 3 اکتوبر سمندر میں طغیانی رہے گی،اس دوران معمول سے کافی بلند لہریں ہونگی۔

محکمہ موسمیات کی جانب سے 30 ستمبر تا 3 اکتوبر تک ماہی گیروں کو سمندر میں نہ جانے کی ہدایت کی گئی ہے جبکہ شہری علاقوں میں اربن فلڈنگ کا بھی خدشہ ظاہر کر دیا گیا ہے۔

محکمہ مو سمیات نے تیز ہواؤں یا آندھی سے بھی نقصان کا خدشہ ظاہر کرتے ہوئے متعلقہ اداروں کو حفاظتی اقدامات کرنے کی ہدایت جاری کر دی ہے۔

طوفان کا نام گلاب کس نے تجویز کیا؟

ماہر موسمیات کا کہنا ہے کہ خیلج بنگال میں موجود ہوا کا کم دباؤ شدت اختیار کرکے سمندری طوفان میں تبدیل ہو گیا ہے، اس سمندری طوفان کا نام گلاب پاکستان کا تجویز کردہ ہے۔

سال 2018 کے بعد رواں ماہ ستمبر میں یہ پہلا سمندری طوفان ہے جسے پاکستان کی جانب سے نام دیا گیا ہے۔

بھارتی محکمہ موسمیات کے سائیکلون ڈیٹا سے ظاہر ہوتا ہے کہ ستمبر کے مہینے میں صرف 14 سائیکلون بنے ہیں جن میں سے 2011 اور 2021 کے دوران (گلاب سمیت) صرف تین سمندری طوفان گزرے ہیں۔

اس دوران ایک سمندری طوفان 2018 جبکہ ایک 2011 میں آیا تھا۔