نواسہ رسولؐ سیدنا حضرت امام حسینؓ کا چہلم آج نہایت عقیدت و احترام کے ساتھ منایا جارہاہے۔

چہلم حسینؓ کے موقع پر ملک بھر میں ذوالجناح، تعزیہ اور علم کے ماتمی جلوس نکالے جارہے ہیں جس میں نوحہ  خوانی کی جارہی ہے۔

اس موقع مجالس عزا بھی منعقد کی جارہی ہے، جن میں علماء کرام اور ذاکرین واقعہ کربلا پر روشنی ڈال رہے ہیں اور حضرت امام حسینؓ کو خراج عقیدت پیش کررہے ہیں۔

ذرائع کے مطابق کراچی میں نشتر پارک سے ایرانیان امام بارگاہ تک جلوس کے راستے سیل کردیئے گئے ہیں۔

سندھ اور پنجاب میں موٹرسائیکل کی ڈبل سواری پر پابندی عائد کردی گئی ہے، جبکہ کوئٹہ میں موبائل فون سروس صبح آٹھ بجے سے شام پانچ بجے تک بند رہے گی۔

کراچی میں حضرت امام حسین ؓکے چہلم کے مرکزی جلوس کے لیے ٹریفک پولیس نے پلان جاری کردیا گیا ہے۔

دوسری جانب سندھ میں شہدائے کربلا کے چہلم کے موقع پر تعلیمی ادارے بند رکھنے کا اعلان بھی کیا گیا ہے۔

چہلم امام حسینؓ کے جلوس کے لئے سیکیورٹی اقدامات

کراچی میں چہلم امام حسینؓ کا مرکزی جلوس نشتر پارک سے برآمد ہوگا، جلوس ایم اے جناح روڈ، ایمریس مارکیٹ،تبت سینٹر ،ڈینسوہال سے ہوتا ہوا کھارادر میں اختتام پذیر ہوگا۔

جلوس کی سیکیورٹی پر 7 ہزار سے زائد پولیس اہلکار و افسران سمیت بڑی تعداد میں رینجرز اہلکار تعینات ہونگے۔

جلوس کی سیکیورٹی کو فول پروف بنانے کے لئے بی ڈی ایس ٹیمیں گزرگاہ کی سوئپنگ کریں گی، جلوس کی گزرگاہ میں آنیوالی بلند عمارتوں پر اسنائپرز تعینات ہونگے۔

جلوس کے روٹ پر آنیوالی تمام گلیاں اور لنک روڈز کو کنٹینر اور رکاوٹیں لگاکر سیل کیا جارہا ہے۔ جلوس کی گزرگاہ میں آنیوالی دکانوں کو بھی سیل کیا جارہا ہے۔

ڈبل سواری پربھی پابندی

شہرقائد میں موٹرسائیکل کی ڈبل سواری پربھی پابندی عائد کردی گئی ہے۔

دوسری جانب پنجاب بھر میں بھی آج موٹرسائیکل کی ڈبل سواری پر پابندی ہوگی۔

لاہور، محکمہ داخلہ کی جانب سے پنجاب بھر میں موٹرسائیکل کی ڈبل سواری پر پابندی لگا دی گئی ہے۔

ایڈیشنل چیف سیکریٹری داخلہ ظفر نصراللہ خان نے نوٹی فکیشن جاری کرتے ہوئے ہدایت جاری کی ہے کہ بزرگ شہریوں اور خواتین کو موٹرسائیکل کی ڈبل سواری سے استثنیٰ حاصل ہو گا۔

نوٹی فکیشن کے مطابق قانون نافذ کرنے والے اداروں کے اہلکاروں کو بھی ڈبل سواری پر پابندی سے استثنیٰ حاصل ہو گا۔