وزیر خزانہ شوکت ترین نے کہا ہے کہ ایف بی آر کے نظام کو مستقل بنیادوں پر اوسطا مہینے میں تقریبا 71000 بار سائبر حملوں کا نشانا بنایا جاتا ہے۔

تفصیلات کے مطابق اسپیکر اسد قیصر کی زیرِ صدارت قومی اسمبلی میں اجلاس ہوا جس میں وزیر خزانہ شوکت ترین نے اظہارِ خیال کرتے ہوئے کہا کہ ایف بی آر کے نظام کو مستقل بنیادوں پر اوسطا مہینے میں تقریبا 71000 بار سائبر حملوں کا نشانا بنایا جاتا ہے، یہ حملے گزشتہ 2 سالوں میں تیزی سے بڑھ رہے ہیں۔

وزیر خزانہ کا کہنا تھا کہ ہیکنگ کمیونٹی کے پاس موجود ٹولز اور طریقے زیادہ طاقتور اور جدید ہیں، گزشتہ 3 سالوں میں ایف بی آر کے سسٹم کی تین بار تقریبا 0.0001 فیصد کی شرح سے متاثر کیا گیا، تیسرے فریق کی مدد سے تحقیقات جاری ہیں۔

شوکت ترین نے کہا کہ 2019 میں ہونے والی خلاف ورزی کی تحقیق کا پتہ نہیں لگایا گیا۔

وزارت تجارت کی جانب سے رواں سال کی برآمدات اور تجارتی خسارے سے متعلق اعداد و شمار قومی اسمبلی میں پیش کیئے گئے ہیں، رواں سال کے 8 ماہ میں تجارتی خسارے کا حجم 26 ارب 32 کروڑ ڈالر رہا، جنوری میں 2 ارب 67 کروڑ، فروری میں 2 ارب56  کروڑ تجارتی خسارہ ہوا، مارچ میں 3 ارب 29 کروڑ ڈالر، اپریل میں تجارتی خسارہ 3 ارب ڈالر رہا، مئی میں تجارتی خسارہ 3 ارب 64 کروڑ، جون میں 3 ارب 65 کروڑ ڈالر ہوا، جولائی میں تجارتی خسارہ کا حجم 3 ارب 26 کروڑ، اگست میں تجارتی خسارہ 4 ارب 23 کروڑ ڈالر رہا، گزشتہ آٹھ ماہ کے دوران برآمدات کا کل حجم17 ارب 77 کروڑ ڈالر رہا۔

وزیر خزانہ شوکت ترین نے کہا کہ روشن ڈیجیٹل اکاؤنٹس کے تحت بیرون ملک مقیم پاکستانی اکاؤنٹ کھول سکتے ہیں، اوورسیز پاکستانی اپنا گھر اسکیم میں بھی خرید سکتے ہیں، گزشتہ سال اوورسیز پاکستانیوں نے 29 ارب ڈالر کے زرمبادلہ بھجوائے، روشن ڈیجیٹل اکاؤنٹ پروگرام میں اوورسیز پاکستانی پروفیشنلز کو ٹارگٹ کیا گیا۔

شوکت ترین کا کہنا تھا کہ 5 ارب ڈالر کا بڑا معاشی پیکج سعودی عرب نے پاکستان کو دیا، سعودی عرب پاکستان کو دوبارہ نیا معاشی پیکج دینے پر سوچ رہا ہے، سعودی عرب پاکستان کو تاخیر سے ادائیگی پر تیل کی فراہمی پر بھی سوچ رہا ہے، خام تیل کی عالمی قیمتوں میں اضافے کے بعد پاکستان نے سعودی عرب سے درخواست کی ہے۔