آرمی چیف جنرل قمر جاوید باجوہ سے یونان کے سفیر کی ملاقات ہوئی ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق ملاقات میں علاقائی سلامتی بالخصوص افغانستان کی موجودہ صورتحال پر بات چیت ہوئی۔

آئی ایس پی آر کے مطابق ملاقات میں مختلف شعبوں میں پاک یونان تعلقات کے فروغ سے متعلق امور پر بھی تبادلہ خیال کیا گیا۔

اس موقع پر آرمی چیف نے کہاکہ پاکستان خطے میں امن کے لیے عالمی شراکت داروں کے ساتھ تعاون اورافغان عوام کے مستحکم و خوشحال مستقبل یقینی بنانے کے لیے پرعزم ہیں۔

انہوں نے کہاکہ پاکستان ہر قسم کی سیاحت، کھیل اور کاروبار کے لیے محفوظ ملک ہے۔ ہم مشترکہ مفادات کے تمام امور میں صحت مندانہ باہمی رابطوں کی حوصلہ افزائی کرتے ہیں۔

آئی ایس پی آر کے مطابق یونان کے سفیر نے کورونا وباء سے نمٹنے کے لیے پاکستان کی کوششوں کو سراہا۔ یونانی سفیر نے افغان صورتحال میں پاکستان کے کردار بشمول کامیاب انخلاء آپریشن اور خطے کے استحکام کی کوششوں کی بھی تعریف کی۔

دوسری جانب سربراہ پاک بحریہ ایڈمرل محمد امجد خان نیازی سے  نائجیریا کے سفیر کی ملاقات ہوئی ہے۔

 ترجمان پاک بحریہ کے مطابق پاکستان میں تعینات نائجیریا کے سفیر جناب محمد بیلو ابیوے نے نیول ہیڈ کوارٹرز اسلام آباد کا دورہ کیا۔

ترجمان پاک بحریہ کے مطابق سربراہ پاک بحریہ ایڈمرل محمد امجد خان نیازی سے نائجیرین  سفیر  کی ملاقات ہوئی ، ملاقات کے دوران باہمی دلچسپی کے امور اور دوطرفہ بحری تعاون کے فروغ پر تبادلہ خیال کیا گیا۔

ترجمان پاک بحریہ کے مطابق ملاقات میں خطے کی میری ٹائم سیکیورٹی صورتحال پر بات چیت ہوئی۔ ملاقات میں دونوں ممالک کے مابین تعلقات کو مزید فروغ دینے کے عزم کا بھی اعادہ کیا گیا۔