کراچی میں ممکنہ طوفانی بارشوں کے پیش نظر قومی ایئرلائن (پی آئی اے) سمیت دیگر ایئرلائنوں کے شیڈول میں تبدیلی جبکہ بعض پروازیں منسوخ کردی گئی ہیں۔

تفصیلات کے مطابق کراچی سے سکھر جانے والی پرواز پی کے 594 منسوخ کردی گئی۔ کراچی سے لاہور جانے والی پی آئی اے کی پرواز پی کے 304 بھی منسوخ کی گئی ہے۔

ذرائع کے مطابق کراچی سے اسلام آباد جانے والی سرین ایئر کی پرواز 502 دوپہر 12 بجے روانہ ہونی تھی لیکن وقت تبدیل کردیا گیا اب 1 بج کر 55 منٹ پر روانگی متوقع ہے۔

اس کے علاوہ کراچی سے اسلام آباد جانے والی پی آئی اے کی پرواز پی کے 368 دوپہر1 بجے روانہ ہونی تھی وقت میں بھی تبدیلی کردی گئی جس کے بعد پرواز کی روانگی 2 بجے توقع کی جارہی ہے۔

کراچی سے کوئٹہ جانے والی پرواز پی کے 310 منسوخ کردی گئی۔ کراچی سے کوئٹہ جانیوالی سرین ایئر کی پرواز کو بھی منسوخ کردیا گیا۔

گلاب کے اثرات: کراچی میں ممکنہ طوفانی بارشیں، الرٹ جاری

آج شہر قائد میں گرج چمک کے ساتھ بارش کا امکان ہے۔

محکمہ مو سمیات کے مطابق اس وقت شہر تیز ہواؤں کی لپیٹ میں ہے، شہر میں 25 کلو میٹر فی گھنٹہ کی رفتار سے شمال مغربی ہوا چل رہی ہے، دوپہر تک شہر میں بارش کے واضح امکانات ہیں۔

محکمہ مو سمیات کا کہنا ہےکہ شہر میں آج سے 2 اکتوبر تک طوفانی بارشوں کے امکانات ہیں، بارش کے ساتھ گرد آلود ہوائیں یا آندھی چلنے کا بھی امکان ہے، سمندری لہریں معمول سے کافی بلند ہوںگی۔

ماہی گیروں کو گہرے سمندر میں نہ جانے کی ہدایت کر دی گئی ہے ،آج کم سے کم درجہ حرارت 27 ڈگری سینٹی گریڈ ریکارڈ کیا گیاہے، آج زیادہ سے زیادہ درجہ حرارت 36 ڈگری سینٹی گریڈ ریکارڈ ہونے کا امکان ہے۔

محکمہ موسمیات کے مطابق ہوا میں نمی کا تناسب 65 فیصد ریکارڈ کیا گیا۔

بحیرہ عرب میں ممکنہ سمندری طوفان شاہین کا خدشہ

بحیرہ عرب میں ممکنہ سمندری طوفان شاہین کا خدشہ پیدا ہو گیا ہے۔

تفصیلات کے مطابق ڈائریکٹر محکمہ موسمیات سردار سرفراز کا کہنا ہے ہوا کا کم دباؤ ڈپریشن بن چکا ہے، آج رات تک ڈیپ ڈپریشن بن جائے گا ، کل صبح سمندری طوفان بننے کے قوی امکانات ہیں، شہر میں آج دوپہر سے تیز بارش کے امکانات ہیں۔

محکمہ موسمیات کے مطابق شہر میں 30 کلو میٹر فی گھنٹہ کی رفتار سے ہوا چل رہی ہے،بارش کے دوران آندھی چلنے کے بھی امکانات ہیں ، اس دوران ہوا کی رفتار 75 تا 80 کلو میٹر فی گھنٹہ ہوسکتی ہے۔

محکمہ موسمیات کا کہنا ہےکہ سمندرمیں طغیانی رہے گی اور معمول سے اونچی لہریں بلند ہونے کے امکانات ہیں ، 2007 میں سمندری طوفان بنا تھا ، صورتحال ویسی ہی معلوم ہورہی ہے
جانی نقصان کا بھی خطرہ ہے، متعلقہ اداروں کو ہائی الرٹ کردیا ہے۔

محکمہ موسمیات نے حیدرآباد میں دو دن تک موسلادہار بارش کا امکان ظاہر کردیا ہے۔

ذرائع کے مطابق اربن ایمرجنسی کے باوجود ضلعے انتظامیہ، واسا اور بلدیا کے سینیٹری ملازمین غائب ہیں۔ بارش کے نام پر بھاری اخراجات سندھ حکومت سے لے کر متعلقہ اداروں کے افسران مبینہ کرپشن میں مصروف ہیں۔