وزیراعظم عمران خان آج ایک روزہ دورے پر کراچی پہنچیں گے۔

تفصیلات کے مطابق وزیراعظم عمران خان آج ایک روزہ دورے پر کراچی آ رہےہیں ، وزیر اعظم کراچی سرکلر ریلوے کا سنگ بنیاد رکھیں گے۔ کراچی سرکلر ریلوے ڈھائی سو ارب روپے کی کثیر لاگت سے مکمل کیا جائے گا۔

ذرائع کے مطابق وفاقی وزرا بھی وزیراعظم عمران خان کے ہمراہ ہوں گے، وزیراعظم سے پارٹی رہنما اور ارکان اسمبلی ملاقاتیں بھی کریں گے۔

وزیراعظم عمران خان کو سندھ میں پارٹی امور اور ترقیاتی کاموں پر بریفنگ دی جائے گی۔

ذرائع کے مطابق وزیراعظم سے مختلف مسالک کے علمائے کرام بھی ملاقات کریں گے۔

واضح رہےکہ گزشتہ ہفتے وفاقی وزیراسد عمر نے اس حوالے سے کراچی کی عوام کو خوشخبری سناتے ہوئے ٹوئٹ کی تھی ۔

ذرائع کے مطابق وفاقی وزیر برائے منصوبہ بندی اور این سی او سی کے سربراہ اسد عمر نے سماجی رابطے کی ویب سائٹ ٹوئٹر پر جاری اپنی ٹوئٹ میں بتایا کہ کراچی سرکلر ریلوے منصوبے کا افتتاح وزیر اعظم عمران خان کریں گے۔

وفاقی وزیر برائے منصوبہ بندی اسد عمر نے اپنے پیغام میں بتایا کہ ایکنک نے 20.7 ارب روپے کا کراچی سرکلر ریلوے منصوبہ منظور کرلیا ہے۔

انہوں نے مزید بتایا کہ کراچی سرکلر ریلوے منصوبے کی افتتاحی تقریب کے مہمان خصوصی وزیر اعظم عمران خان ہونگے۔

ECNEC just approved the Rs. 20.7 billion infrastructure project for karachi circular railway (KCR). PM @ImranKhanPTI will be the chief guest at the ground breaking ceremony for the project in Karachi next week inshallah

Advertisement

— Asad Umar (@Asad_Umar) September 24, 2021

یاد رہےکہ گزشتہ ماہ وفاقی وزیر برائے منصوبہ بندی اور این سی او سی کے سربراہ اسد عمر نے اسلام آباد میں کراچی سرکلر ریلوے (کے سی آر) اور ریلوے فریٹ کوریڈور منصوبوں  کی تازہ ترین صورتحال کا جائزہ لینے کے لیے ایک اجلاس کی صدارت بھی کی تھی، جس میں اسد عمر کو کو کراچی سرکلر ریلوے (کے سی آر) کے بارے میں بریفنگ دی گئی تھی۔

بریفنگ میں بتایا گیا تھا کہ کے سی آر نے ماحول دوست الیکٹرک ٹرینوں کا استعمال کرتے ہوئے 43 کلومیٹر طویل عالمی معیار کے سستی ماس ٹرانزٹ سسٹم کی تعمیر کا منصوبہ تیار کیا گیا ہے۔

اجلاس میں  بتایا گیا کہ اس پروجیکٹ سے 40 فیصد کارگو کی سہولت فراہم کی جائے گی، منصوبہ پی پی پی اتھارٹی کو اس کی منظوری کے لیے پیش کر دیا گیا ہے۔

اس مو قع پراسد عمر نے پاکستان ریلوے کو ہدایت کی تھی کہ وہ تمام کوڈل فارمیلیٹیز کو جلد سے جلد مکمل کریں  اور ستمبر 2021 تک کے سی آر انفراسٹرکچر کے سنگ بنیاد کے لیے تمام ضروری انتظامات کو یقینی بنائے۔

وفاقی وزیر اسد عمر نے ہدایت کی کہ راہداری کو سروس کی سطح کے نتائج کو بہتر بنانے کے لیے ڈیزائن کیا جانا چاہئےاور مالی اخراجات کے علاوہ منزل کا وقت بھی کم کرنا ہوگا۔

وفاقی وزیر اسد عمر نے تمام متعلقہ عہدیداروں کو یہ بھی ہدایت کی کہ وہ منصوبوں کی مقررہ مدت میں تکمیل کو یقینی بنائیں ، کیونکہ یہ منصوبے کراچی کے لوگوں کی سماجی و معاشی بہبود کے لیے اہم ہیں۔