وفاقی وزیر فواد چوہدری کا کہنا ہے کہ انگلش بورڈ کی معذرت اور پاکستان کے دورے کا اعلان ہمارے مؤقف کی کامیابی ہے۔

 تفصیلات کے مطابق وفاقی وزیر اطلاعات و نشریات فواد چوہدری نے سماجی رابطے کی ویب سائٹ ٹوئٹر پرجاری اپنے پیغام میں کہا ہے کہ کرکٹ کے کھلاڑیوں، سفارت کاروں، انٹرنیشنل میڈیا اور ان تمام لوگوں کا شکریہ، جنہوں نے اس معاملے پر پاکستان کا ساتھ دیا، پاکستان کی کرکٹ کے خلاف ایک اور سازش ناکام ہوئی۔

Announcement of ECB to visit Pakistan next year is a welcome step,I would like to thank stars of cricket world, diplomatic community, Media And Cricket lovers around the world on their support for pakistan Cricket, yet again Pak has emerged as strong and resilient nation

— Ch Fawad Hussain (@fawadchaudhry) September 29, 2021

واضح رہےکہ انگلش کرکٹ بورڈ نے دورہ پاکستان کی منسوخی پر معافی مانگ لی ہے۔

پاکستان اورانگلینڈ کے درمیان 2 ٹی ٹونٹی میچ کی سیریز اگلے ماہ ہونی تھی تاہم نیوزی لینڈ کی جانب سے دورہ پاکستان اچانک منسوخ کیے جانے کے بعد انگلینڈ نے بھی دورہ پاکستان سے معذرت کرلی تھی۔

چیئرمین این وٹمور کا اس حوالے سے کہنا تھا کہ فیصلے سے پاکستان سمیت کرکٹ فینز سے معذرت خواہ ہوں، مجھے افسوس ہے فیصلے سے پاکستان میں لوگ مایوس ہوئے، پاکستان کا دورہ نہ کرنے کا فیصلہ بورڈ کا تھا، فیصلے کے لئے کھلاڑیوں سے مشورہ نہیں کیا گیا تھا، سیزن کی مصروفیات کی وجہ سے ذہنی تندرستی کے لیے فیصلہ کیا گیا، بورڈ نے جو فیصلہ کیا وہ بہت مشکل تھا۔

دوسری جانب نیوزی لینڈ کی ٹیم نے گزشتہ دنوں سیریز کے پہلے میچ سے قبل سیکیورٹی کو جواز بنا کر دورہ پاکستان ختم کردیا تھا جس کے بعد دونوں ملکوں کے درمیان سیریز بھی ملتوی کردی گئی۔

اس سے قبل گزشتہ روز وزیر خارجہ شاہ محمود قریشی کا کہنا تھا کہ انہوں نے برطانوی وزیرخارجہ سے کہا ہے کہ کرکٹ فیصلے پر نظرثانی کریں، انگلینڈ کرکٹ بورڈ کے فیصلے سے مایوسی ہوئی ہے۔

لندن میں پاکستانی میڈیا سے گفتگو کرتے ہوئے وزیر خارجہ شاہ محمود قریشی کا کہنا تھا کہ ریڈ لسٹ اور کرکٹ کی وجہ سے پاکستانی کمیونٹی میں تشویش تھی، انگلینڈ کرکٹ بورڈ کے فیصلے سے مایوسی ہوئی۔

اس حوالے سے برطانوی وزیرخارجہ سے کہا ہےکہ کرکٹ فیصلے پر نظر ثانی کریں۔

 برطانوی وزیرخارجہ نے کہا  کہ فیصلہ حکومت کا نہیں کرکٹ بورڈ کا تھا ،ہم انگلینڈ ٹیم کے دورۂ پاکستان کے فیصلے پر نظر ثانی کریں گے۔