وزیر خارجہ مخدوم شاہ محمود قریشی نے کہا ہے کہ ایک پرامن اور مستحکم افغانستان نہ صرف پاکستان بلکہ پورے خطے کیلئے انتہائی اہمیت کا حامل ہے۔

تفصیلات کے مطابق کینیڈین وزیر خارجہ مارک گارنیو کا وزیر خارجہ مخدوم شاہ محمود قریشی سے ٹیلی فونک رابطہ ہوا جس میں دونوں وزرائے خارجہ کے مابین دو طرفہ تعلقات اور افغانستان کی ابھرتی ہوئی صورتحال پر تبادلہ خیال ہوا۔

مخدوم شاہ محمود قریشی نے کہا کہ ایک پرامن اور مستحکم افغانستان نہ صرف پاکستان بلکہ پورے خطے کیلئے انتہائی اہمیت کا حامل ہے، وزیر خارجہ نے کنیندین وزیر خارجہ کو افغانستان کی صورتحال پر متفقہ لائحہ عمل کی تشکیل کے لیے کیے گئے حالیہ چار ملکی دورے کی تفصیلات سے آگاہ کیا۔

وزیر خارجہ نے افغانستان میں اجتماعیت کے حامل سیاسی تصفیے کی ضرورت پر زور دیتے ہوئے افغانستان میں قیامِ امن کو خطے کے امن و استحکام اور ترقی کیلئے ناگزیر قرار دیا، وزیر خارجہ مخدوم شاہ محمود قریشی نے عالمی برادری پر زور دیا کہ وہ افغانستان کی معاشی و انسانی معاونت کیلئے آگے بڑھے۔

مخدوم شاہ محمود قریشی نے کہا کہ پاکستان افغانستان میں پنپتے ہوئے انسانی المیے کے پیشِ نظر افغانوں کو ہوائی اور زمینی راستوں سے امدادی سامان کی فراہمی جاری رکھے ہوئے ہے، وزیر خارجہ نے افغانستان کو امدادی سامان کی ترسیل کیلئے انسانی راہداری کھولنے کی بابت کینیڈین ہم منصب کو آگاہ کیا۔

وزیر خارجہ نے کہا کہ عالمی برادری کو ان ممالک کو نظر انداز نہیں کرنا چاہیے جو عرصہ دراز سے لاکھوں افغان مہاجرین کی میزبانی کرتے آ رہے ہیں۔

دونوں وزرائے خارجہ نے دو طرفہ تعلقات کی نوعیت پر اطمینان کا اظہار کرتے ہوئے انہیں مزید مستحکم بنانے کے عزم کا اظہار کیا۔

وزیر خارجہ شاہ محمود قریشی کا کہنا تھا کہ کورونا وبائی صورتحال میں بہتری کی صورت میں پاکستان اور کینیڈا کے درمیان اگلے سیاسی مشاورتی اجلاس کے بالمشافہ انعقاد کے متمنی ہیں، وزیر خارجہ نے کینیڈین وزیر خارجہ کے ساتھ ہملٹن کینیڈا میں پاکستانی کینیڈین شہری کی ہلاکت اور اس کے 63 سالہ والد فقیر علی کے اغواء کا معاملہ اٹھایا۔

کینیڈین وزیر خارجہ مارک گارنیو نے وزیر خارجہ مخدوم شاہ محمود قریشی کو یقین دلایا کہ متاثرہ خاندان کو انصاف کی فراہمی کیلئے کینیڈین حکومت معاملے کی مکمل تحقیقات کر رہی ہے۔

وزیر خارجہ شاہ محمود قریشی نے کینیڈین ہم منصب سے مطالبہ کیا کہ وبائی صورتحال میں بہتری کو پیشِ نظر رکھتے ہوئے طلباء اور کاروباری حضرات کی مشکلات میں کمی لانے کیلئے ویزہ ایڈوائزری پر نظر ثانی کی جائے۔

کینیڈین وزیر خارجہ مارک گارنیو نے افغانستان میں قیامِ امن کیلئے پاکستان کی کاوشوں کو سراہا، کینیڈین وزیر خارجہ نے کابل سے کینیڈین شہریوں کے انخلاء میں پاکستان کی جانب سے فراہم کی گئی بھرپور معاونت پر وزیر خارجہ مخدوم شاہ محمود قریشی اور پاکستانی قیادت کا خصوصی شکریہ بھی ادا کیا۔

وزیر خارجہ شاہ محمود قریشی نے کنیندین ہم منصب کو یقین دلایا کہ پاکستان افغانستان سے انخلاء کے عمل میں معاونت کا سلسلہ جاری رکھنے کیلئے پر عزم ہے۔