پٹرولیم مصنوعات کی قیمتوں میں مزید اضافے کی سمری اوگرا نے پٹرولیم ڈویژن کوارسال کر دی ہے۔

تفصیلات کے مطابق یکم اکتوبر سے پٹرول کی قیمت میں 5 روپے 25 پیسے فی لیٹر تک اضافے کی سفارش کی گئی ہے۔

ذرائع کے مطابق ڈیزل کی قیمت میں ساڑھے 3 فی لٹر تک اضافے کا امکان ہے۔ قیمتوں میں اضافے کاحتمی فیصلہ وزارت خزانہ وزیراعظم کی مشاورت سےکرے گی۔

ذرائع کے مطابق قیمتوں میں ردوبدل کا انحصار پٹرولیم لیوی اورجی ایس ٹی پر ہوگا۔  اس وقت پٹرول پرپٹرولیم لیوی 5 روپے 62 پیسے فی لیٹر ہے۔ ڈیزل پر فی لیٹر 5 روپے 14 پیسے پٹرولیم لیوی عائد ہے۔

واضح رہے کہ 15 ستمبر کو وفاقی حکومت نے پٹرولیم مصنوعات کی قیمتوں میں پانچ روپے سے زائد کا اضافہ کیا تھا، اس اضافے کے بعد پٹرول 123 روپے 30 پیسے اور ہائی اسپیڈ ڈیزل 120 روپے چار پیسے فی لیٹر ہوا، مٹی کا تیل 92 روپے 26 پیسے جب کہ لائٹ ڈیزل کی قیمت 90 روپے 69 پیسے ہوئی تھی۔

گزشتہ دنوں وزیر توانائی حماد اظہر نے اپنے ایک بیان میں کہا کہ حکومت نے اگست سے اب تک پٹرولیم مصنوعات 435 ارب روپے کا ریلیف دیا ہے، (ن) لیگ دور میں قیمتیں کم نہیں کی جاتی تھیں بلکہ بڑھا دی جاتی تھی، ایک وقت میں سیلز ٹیکس 56 فیصد تھا جو اب 10 فیصد ہے۔

وزیر توانائی حماد اظہر کا کہنا تھا کہ آج ملک میں پٹرول اور ڈیزل کی قیمت خطے کے دیگر ممالک سے خاصی کم ہے، سابقہ ادوار کی نسبت پٹرول پر اب کم ٹیکس نافذ ہیں، کورونا کے باعث دنیا بھر میں اشیاء کی قیمتیں بڑھی ہیں جہاں پٹرول ہم سے سستا ہے وہاں پٹرولیم پیدا ہوتا ہے۔

 وفاقی وزیر توانائی حماد اظہر نے کہا کہ نعرے بازی گالی گلوچ سے نکل کر دیکھا جائے کیسے عوام کو ریلیف دیا جاسکتا ہے، احساس پروگرام کے تحت فنڈز کا اجراء دوگنا کردیا گیا ہے، عالمی سطح پر آنے والی مہنگائی سے اپنے عوام کو بچایا جارہا ہے، پاکستان میں پٹرولیم مصنوعات پرٹیکس بھی کم ہے اور قیمتیں بھی کم ہیں۔