وزیراعظم نے انتخابی اصلاحات سمیت اہم ایشوز پر حکومتی و اتحادی ارکان کو اعتماد میں لینے کا فیصلہ کر لیا ہے۔

تفصیلات کے مطابق وزیراعظم عمران خان کی زیر صدارت پی ٹی آئی کی پارلیمانی پارٹی کا اجلاس آج ہوگا ، اجلاس سہ پہر 2 بجے پارلیمنٹ ہاؤس میں ہو گا۔

ذرائع کے مطابق وزیراعظم اس اجلاس میں اہم ملکی و قومی امور پر ارکان کو اعتماد میں لیں گے۔

اس کے ساتھ ساتھ اجلاس میں قومی اسمبلی و سینیٹ کے اجلاسوں سے متعلق حکمت عملی طے ہوگی۔

اجلاس میں اہم قانون سازی پر وزیراعظم عمران خان ارکان سے مشاورت کریں گے۔

ذرائع کے مطابق وزیراعظم عمران خان انتخابی اصلاحات، ای وی ایم، آئی ووٹنگ سمیت اہم ایشوز پر گفتگوبھی کریں گے۔

دوسری جانب توشہ خانہ میں تحائف کی خریداری کا معاملہ وفاقی کابینہ میں بھی پہنچ گیا، وفاقی وزراء نے وزیراعظم سے بیرون ممالک سے ملنے والے تحائف سے متعلق پوچھ لیا۔

ذرائع کے مطابق کابینہ اجلاس کے دوران وفاقی وزیر شفقت محمود بول پڑے، اجلاس کے دوران وفاقی وزیر شفقت محمود نے کہا کہ وزیراعظم صاحب میڈیا پر توشہ خانے سے متعلق آپ کے بارے میں باتیں ہورہی ہیں، ہمیں حقیقت سے آگاہ کیا جائے۔

شیریں مزاری نے بھی کہا کہ دنیا کے دیگر ممالک کے سربراہان بھی ملنے والے تحائف کی تفصیلات بتاتے ہیں، ہمیں بھی یہ تفصیلات بتانی چاہیے۔

اجلاس کے دوران مراد سعید نے تحائف کی تفصیلات بتانے کی تجویز سے اختلاف کرتے ہوئے کہا کہ اس سے دوست ممالک ناراض ہوں گے۔

توشہ خانے میں تحائف کے حوالے سے پوچھے گئے وفاقی وزراء کے سوالات پر وزیر اعظم عمران خان کا کہنا تھا کہ تحائف کے بارے میں میرا مؤقف سامنے آچکا ہے، ہماری حکومت میں تحائف کی رقم کو مختص کردیا گیا ہے۔

وزیر اعظم عمران خان کا مزید کہنا تھا کہ پہلے صرف 25 فیصد تحفوں کے پیسے دیئے جاتے تھے لیکن اب ہم نے یہ رقم بڑھا کر 50 فیصد کر دی ہے، اب میں اور میرے وزراء سمیت جو بھی سرکاری تحفہ توشہ خانے سے لینا چاہے اسے 50 فیصد رقم جمع کروانی ہو گی۔