وزیر اعلیٰ پنجاب سردار عثمان بزدار نے کہا ہے کہ زخمی پولیس اہلکاروں کو علاج معالجے کی ہر ممکن سہولتیں مہیا کی جائیں گی۔

تفصیلات کے مطابق وزیر اعلیٰ پنجاب سردار عثمان بزدار نے میو ہسپتال کا  دورہ کیا اور مظاہرین کے تشدد و فائرنگ سے زخمی پولیس اہلکاروں کی عیادت کی۔

وزیر اعلیٰ عثمان بزدار فرداً فرداً زخمی ڈی ایس پی، ایس ایچ او اور دیگر اہلکاروں کے پاس گئے، ان کی خیریت دریافت کی اور ان کے حوصلے اور جذبے کو سراہا۔

سردار عثمان بزدار نے زخمی پولیس اہلکاروں کے علاج معالجے کے لئے ہسپتال انتظامیہ کو ضروری ہدایات دیتے ہوئے کہا کہ ان کی دیکھ بھال میں کوئی کسر اٹھا نہ رکھی جائے۔

انہوں نے کہا کہ پنجاب حکومت کی ہمدردیاں آپ کے ساتھ ہیں، حکومت آپ کے ساتھ کھڑی ہے، آپ فرض کی ادائیگی کے دوران زخمی ہوئے ہیں، حکومت آپ کی فرض شناسی کوسراہتی ہے، حکومت آپ اور آپ کے خاندان کی ہر ممکن دیکھ بھال کرتی رہے گی۔

عثمان بزدار نے پولیس اہلکاروں سے گفتگو کرتے ہوئے کہا کہ آپ ہمارے ہیروز ہیں، آپ کو تنہا نہیں چھوڑیں گے، آپ کی آمد سے ہمارے حوصلے بڑھے ہیں۔

وزیر اعلیٰ عثمان بزدار نے آرتھوپیڈک وارڈ میں زیرِ علاج دیگر مریضوں کی بھی عیادت کی اور مریضوں سے ہسپتال میں فراہم کی جانے والی سہولتوں کے بارے میں دریافت کیا، انہوں نے مریضوں سے گفتگو کرتے ہوئے کہا کہ آپ کو کوئی مسئلہ ہے تو بتائیں میں حل کروں گا۔

اس موقع پر صوبائی وزیر صنعت میاں اسلم اقبال، معاون خصوصی اطلاعات حسان خاور، سیکرٹری سپیشلائزڈ ہیلتھ کیئر و میڈیکل ایجوکیشن، کمشنر لاہور ڈویژن، ڈپٹی کمشنر لاہور اور متعلقہ حکام بھی موجود تھے۔