وزیر اعظم کے معاون خصوصی برائے سیاسی ابلاغ ڈاکٹر شہباز گل نے کہا ہے کہ اس مرتبہ پوری قوم تاریخی طور پر ربیع الاول کو منائے گی۔

تفصیلات کے مطابق وزیر اعظم کے معاون خصوصی برائے سیاسی ابلاغ ڈاکٹر شہباز گل نے ڈی چوک پر محفل سماع کے موقع پر میڈیا سے گفتگو کرتے ہوئے کہا کہ لاکھوں کروڑوں درود ہمارے خاتم النبیین ﷺ اور ان کی آل پر، یہ خوشی کا مہینہ ہے کیونکہ اس میں نبی پاک ﷺ تشریف لائے۔

ڈاکٹر شہباز گل کا کہنا تھا کہ پوری قوم محمد ﷺ کے ساتھ عشق کرتی ہے، اس مرتبہ ایک سچا عاشق رسول اور خادم محمد مصطفی یہاں بیٹھا ہے۔

انہوں نے ہدایت دینے کہ بھرپور انداز میں کہا کہ حضور پاک ﷺ کے شایان شان طریقے سے یہ موقع منایا جائے، پہلی مرتبہ ڈی چوک میں سیاسی جلسوں سے ہٹ کر ایک محفل سماع کا انعقاد کیا جا رہا ہے، اس مرتبہ پوری قوم تاریخی طور پر اس بابرکت ماہ کو منائے گی، آج ہم نے تمام اراکین پارلیمان، سینیٹرز اور اپوزیشن کو بھی یہاں آنے کی دعوت دی ہے۔

وزیر اعظم کے معاون خصوصی برائے سیاسی ابلاغ ڈاکٹر شہباز گل کا کہنا تھا کہ جب حضور پاک ﷺ کا نام آئے تو بھوت اور چڑیلیں بھی نکلتے ہیں تو جب وہ نکلیں تو ان پر توجہ نہ دیں، جب عمران خان نے ریاستِ مدینہ کا عمل شروع کیا تو کتنی مشکلات سامنے آئیں، عمران خان ڈٹے ہوئے ہیں اور اس ملک کو ریاست مدینہ بنائیں گے۔