وفاقی وزیر ریلوے اعظم سواتی کا کہنا ہےکہ میری پیشی سے الیکشن کمیشن کا وقار مضبوط ہواہے۔

تفصیلات کے مطابق وزیر ریلوے اعظم سواتی نے الیکشن کمیشن کے باہر میڈیا سے گفتگو کرتے ہوئے کہاکہ خوشی ہے کہ کسی چوری ڈاکہ میں پیش نہیں ہورہا، قانون سب کے لیے برابر ہے، میری پیشی سے الیکشن کمیشن کا وقار مضبوط ہوا ہے۔

اعظم سواتی نے کہاکہ الیکشن کمیشن کی پاسداری کے لیے یہاں پیش ہوا ہوں۔

ذرائع کے مطابق آج صبح وفاقی وزیر ریلوے اعظم سواتی الیکشن کمیشن پہنچے ، گزشتہ سماعت پر الیکشن کمیشن نے اعظم سواتی کو شوکاز نوٹس جاری کیا تھا۔

واضح رہےکہ الیکشن کمیشن نے وفاقی وزیر ریلوے اعظم سواتی کو شوکاز کا جواب دینے کے لیے 15 روز کی مہلت دے دی اور مزید سماعت 11 نومبر تک ملتوی کردی۔

اس سے قبل الیکشن کمیشن آف پاکستان (ای سی پی) نے وفاقی وزیر ریلوے اعظم سواتی کی جانب سے مہلت کی استدعا مسترد کرتے ہوئے 26 اکتوبر کو انہیں ذاتی حیثیت میں پیش ہونے کا حکم دیا تھا۔

واضح رہے کہ قائمہ کمیٹی برائے پارلیمانی امور کے اجلاس میں الیکشن (ترمیمی) ایکٹ 2021 میں مجوزہ ترامیم پر تبادلہ خیال کے دوران اعظم سواتی نے کہا تھا کہ الیکشن کمیشن ہمیشہ دھاندلی میں ملوث رہا ہے اور ایسے اداروں کو آگ لگا دینی چاہیے۔

انہوں نے کمیٹی میں مجوزہ ترامیم پر ووٹنگ کے عمل سے قبل الیکشن کمیشن پر سخت تنقید کرتے ہوئے الزام لگایا تھا کہ کمیشن نے رشوت لے کر انتخابات میں دھاندلی کی۔