صوبائی وزیر بلدیات سید ناصر حسین شاہ نے کہا ہے کہ چیئرمین بلاول بھٹو زرداری کی ہدایات پر مختلف علاقوں کا دورہ کر رہے ہیں۔

تفصیلات کے مطابق صوبائی وزیر بلدیات سید ناصر حسین شاہ نے سکھر میں میڈیا سے گفتگو کرتے ہوئے کہا کہ چیئرمین بلاول بھٹو کی ہدایات پر مختلف علاقوں کا دورہ کر رہے ہیں، اس شہر میں بھی سولڈ ویسٹ مینجمنٹ پروگرام لا رہے ہیں، جتنے بھی شہری علاقے ہیں وہاں پانی کھڑے ہونے کی شکایات آرہی ہیں، پبلک ہیلتھ میونسپل پر اور میونسپل والے پبلک ہیلتھ پر الزام لگاتے ہیں۔

سید ناصر حسین شاہ نے کہا کہ ہم نے اب معاملے کا حل نکال لیا ہے، بیراج کی زندگی پوری ہوچکی ہے، ورلڈ بینک سے بات ہوئی ہے، جلد سروے کا کام شروع کیا جائے گا، شروع سے ہی پی ٹی آئی الزام اور انتقام پر کام کرتی آئی، جب انکی انکوائری ہو رہی تھی اس میں تاخیر کرتی آرہی تھی، پی ٹی آئی ایک بات میں کامیاب ہے اور وہ جھوٹ بولنا ہے، پی ٹی آئی وزرا بڑی ڈھٹائی سے جھوٹ بولتے ہیں۔

ناصر شاہ کا کہنا تھا کہ گندم اور آٹے کی قیمت ملک بھر میں زیادہ ہے مگر الزام سندھ پر آتا ہے کہ سندھ کوٹا جاری نہیں کررہا، ہم نے اپنے کاشتکار کو دو ہزار روپے فی من پر دئیے دیگر صوبوں نے 16 اور 18 سو روپے دیئے۔

صوبائی وزیر بلدیات سید ناصر حسین شاہ نے کہا کہ محسن پاکستان عبد القدیر خان کی پاکستان کے لیے خدمات ہیں، صرف سندھ کے وزیر اعلیٰ سید مراد علی شاہ نے ڈاکٹر عبد القدیر خان کی آخری رسومات میں شرکت کی، ڈاکٹر عبد القدیر خان نے نہ صرف پاکستان بلکہ عالم اسلام کے لیے خدمات دیں۔

ان کا کہنا تھا کہ جب تک بلاول بھٹو کی ہدایات پر عمل کیا گیا تب تک پی ڈی ایم کامیاب رہی، بلدیاتی انتخابات کے لیے مکمل طور پر تیار ہیں، فروری یا مارچ میں بلدیاتی انتخابات کرائیں گے، نئی مردم شماری کے حوالے سے پچھلی مردم شماری پر اعتراضات ہیں، خواہش ہے ان اعتراضات کو پارلیمنٹ میں بھی لایا جائے۔

صوبائی وزیر بلدیات سید ناصر حسین شاہ نے کہا کہ مردم شماری نئے عام انتخابات کے لیے کروائی جاری ہے، موجودہ حکومت صرف آرڈیننس تک رہ گئی، تاریخی مہنگائی تاریخی بد عنوانی اس سے پہلے کبھی نہیں ہوئی۔