وفاقی وزیر برائے بحری امور سید علی حیدر زیدی نے کہا ہے کہ پاک بھارت کرکٹ میچ کو لے کر بہت پر امید ہوں۔

تفصیلات کے مطابق وفاقی وزیر برائے بحری امور سید علی حیدر زیدی نے میڈیا سے گفتگو کرتے ہوئے کہا کہ امید ہے آج پاکستان بھارت کے چھکے چھڑائے گا، پاک بھارت کرکٹ میچ کو لے کر بہت پر امید ہوں، پاک بھارت کا کرکٹ میچ ہمیشہ سے دلچسپ ہوتا ہے۔

علی حیدر زیدی کا کہنا تھا کہ دونوں ملکوں کی عوام کرکٹ کو لے کر بے حد جزباتی ہوتی ہے، پاک و بھارت میں آج جنگ نہیں کرکٹ میچ کھیلا جائے گا۔

وفاقی وزیر برائے بحری امور سید علی حیدر زیدی نے کہا کہ امید ہے کہ شاہین آفریدی اچھا پرفارم کریں گے اور سب کو سرپرائز دیں گے۔

اس سے قبل وفاقی وزیر برائے بحری امور سید علی حیدر زیدی نے نجی یونیورسٹی میں کانووکیشن تقریب سے خطاب کرتے ہوئے کہا تھا کہ تمام طلبہ کو اپنی ڈگری مکمل کرنے پر مبارکباد پیش کرتا ہوں۔

وفاقی وزیر کا کہنا تھا کہ تعلیمی اداروں میں بہت یادگار لمحات ہوتے ہیں، میں جب بھی یونیورسٹی یا کالج کے سامنے گزرتا ہوں تو مجھے اپنا زمانہ طالبعلمی یاد آجاتا ہے، زمانہ طالب علمی کو ہمیشہ یاد رکھیں۔

علی حیدر زیدی نے کہا تھا کہ کامیابی کا راز اتحاد، ایمان اور تنظیم میں ہے، تمام طلبہ ان سنہری اصول پر عملدرآمد ہوں اور کامیابی حاصل کریں، وزیر اعظم عمران خان سے سیکھا ہے کہ ہارتا وہ ہے جو ہار مان لیتا ہے، سب سے زیادہ کامیاب انسان وہ ہوتا ہے جس میں انسانیت کا جذبہ ہو، نوجوان ہی اس ملک کا سرمایہ ہے۔

وفاقی وزیر برائے بحری امور سید علی حیدر زیدی کا مزید کہنا تھا کہ آج پاکستان و بھارت کا کرکٹ میچ ہے، کرکٹ ٹیم مکمل فارم میں ہے اور امید ہے کہ بھارت کو کروائیں گے۔