مہنگائی کی ستائی عوام پر حکومت کی جانب سے بجلی بم گرا دیا گیا ہے۔

تفصیلات کے مطابق حکومت نے بجلی کی قیمتوں میں 1 روپے 68 پیسے فی یونٹ اضافہ کر دیا ہے۔

ذرائع کے مطابق وفاقی کابینہ نے بجلی مہنگی کرنے کی منظوری دے دی، کابینہ نے سرکولیشن سمری کے ذریعے بجلی مہنگی کرنے کی منظوری دی۔

 ذرائع کے مطابق بجلی کی قیمتوں میں اضافے کی سمری وزارت توانائی کی جانب سے بھجوائی گئی تھی۔

دوسری جانب پٹرولیم مصنوعات ایک مرتبہ پھر مہنگی کرنے کی بھی تیاریاں جاری ہیں۔

تفصیلات کے مطابق اوگرا نے پٹرولیم مصنوعات میں دس روپے فی لیٹر اضافہ کرنے کی سفارش کر دی ہے، حتمی فیصلہ وزیراعظم عمران خان کی منظوری کے بعد کیا جائے گا۔

پٹرول کی قیمت میں 6 روپے اضافے کا امکان ہے، اوگرا نے پٹرولیم مصنوعات 10 روپے فی لیٹر تک مہنگی کرنے کی سفارش  کردی ہے۔

اوگرا نے پٹرولیم مصنوعات کی قیمتوں میں اضافے کی سمری ارسال کردی ہے۔

ذرائع کے مطابق  پٹرول کی قیمت میں 5 روپے 90 پیسے فی لیٹر اضافے کی تجویز دی گئی ہے جبکہ ہائی سپیڈ ڈیزل 10 روپے فی لیٹر مہنگا کرنے کی تجویز دی گئی ہے۔

ذرائع کا کہنا ہے کہ قیمتوں میں اضافے کی حتمی منظوری وزیر اعظم عمران خان دیں گے، نئی قیمتوں کا اطلاق وزارت خزانہ کے نوٹی فکیشن کے بعد ہو گا۔

یاد رہے کہ اس سے قبل  پٹرول کی قیمت کے حوالے سے وزیراعظم کا بڑا بیان سامنے آیا تھا ۔

وزیراعظم عمران خان کی زیر صدارت پاکستان تحریک انصاف (پی ٹی آئی) کی پارلیمانی پارٹی کا اجلاس ہوا تھا جس میں وزیراعظم نے نئے جی ڈی آئی ایس آئی سمیت دیگر اہم امور پر گفتگو کی تھی ۔

اجلاس کے دوران مہنگائی کے حوالے سے  عمران خان کا کہنا تھا کہ حکومت کو مہنگائی کا احساس ہے۔

اجلاس کی صدارت کرتے ہوئے وزیراعظم کا کہنا تھا، مہنگائی کنٹرول کرنے کی ہر ممکن کوشش کررہے ہیں، پاکستان میں اب بھی خطے میں پٹرول کی قیمت سب سے کم ہے۔

عمران خان نے کہا تھا کہ عالمی منڈی میں چیزوں کی قیمتوں میں غیر معمولی اضافہ ہوا ہے۔

وزیراعظم عمران خان نے مزید کہا تھا کہ ترقیاتی منصوبے ایم این ایز کی مشاورت سے شروع کریں گے، صحت کارڈ اور احساس راشن کارڈ بھی ارکان اسمبلی کی مشاورت سے دیں گے۔