لاہور ایئرپورٹ پر 3 گھنٹوں سے فضائی آپریشن معطل ہے۔

تفصیلات کے مطابق ملکی اور غیرملکی ایئرلائن کی پروازیں تاخیر کا شکار ہیں، نجی کمپنی کے کارگو جہاز کے رن وے پر ٹائر برسٹ ہونے کے باعث فلائٹ آپریشن معطل ہے۔

ترجمان سی اے اے کا کہنا ہے کہ پی آئی اے، سیرین ایئرلاین، ایئرسیال اور ایئربلو کی لاہور سے کراچی کی پرواز تاخیر کا شکار ہیں، پی آئی اے کی سعودی عرب کے شہر ریاض سے لاہور کی پرواز کو اسلام آباد موڑ دیا گیا ہے۔

ترجمان سی اے اے کے مطابق شام 7 بجے کارگو جہاز کے ٹائر برسٹ ہوئے تھے، رن وے بند ہونے کے باعث فضائی  آپریشن معطل ہے، لاہور ایئرپورٹ کا دوسرا متبادل رن وے مرمت کے باعث بند ہے۔

یاد رہے کہ لاہور ائیرپورٹ پر غیر ملکی کارگو طیارہ حادثے سے بال بال بچ گیا تھا، ٹیک آف کے دوران رن وے پر طیارے کے تین ٹائر پھٹ گئے تھے، کپتان نے ایمرجنسی بریک لگا کر طیارے کو رن وے پر روک لیا گیا تھا، کارگو طیارہ لاہور سے بحرین جارہا تھا۔

ذرائع کا کہنا ہے کہ کنٹرول ٹاور نے ائیرپورٹ رن بند ہونے پر دیگر پروازوں کو بھی روک لیا، طیارے کے ٹائر پھٹتے ہی ریسکیو گاڑیاں رن پر پہنچ گئیں، ڈی ایچ ایل کے کارگو جہاز کو حج ٹرمینل کے سامنے پارک کیا جارہا ہے، کارگو پرواز 512 کو لاہور سے بحرین روانہ ہونا تھا۔

ذرائع کے مطابق رن بند ہوجانے پر ایئربلیو کی کراچی سے آنے والی پرواز 406 اسلام آباد موڑ دی گئی، پی آئی اے کی لاہور سے کراچی جانے والی پرواز 305 کی روانگی بھی روک دی گئی، رن وے بند ہونے سے مزید پروازوں کا شیڈول متاثر ہونے کا خدشہ ہے۔