امیر جماعت اسلامی سراج الحق نے کہا ہے کہ پی ٹی آئی حکومت نے اداروں کو کمزور اور بدنام کیا۔

تفصیلات کے مطابق امیر جماعت اسلامی سراج الحق نے اپنے جاری کردہ ایک بیان میں کہا کہ پی ٹی آئی حکومت نے اداروں کو کمزور اور بدنام کیا، گورننس بہتر کی ہوتی تو حالات قدرے مختلف ہوتے، پی ٹی آئی کے سوا تین برس ناکامیوں کی داستان ہیں۔

سراج الحق نے کہا کہ چترال سے کراچی تک عوام کی اکثریت کسمپرسی میں ہے، بے روزگاری کا طوفان تھمنے کا نام نہیں لے رہا، اندرون سندھ، جنوبی پنجاب، بلوچستان مسائل کی آماجگاہ بن چکا ہے۔

ان کا کہنا تھا کہ عوام کا واحد ذریعہ روزگار ماہی گیری ختم کیا جا رہا ہے، سی پیک اور گوادر پورٹ پر پہلا حق بلوچستان کے عوام کا ہے، سیکرٹری جنرل جماعت اسلامی بلوچستان کو فورتھ شیڈول میں ڈالنے کی مذمت کرتے ہیں۔

سراج الحق نے کہا کہ مولانا ہدایت الرحمن گوادر کے عوام کی آواز ہیں، سیکیورٹی ادارے عوام کو احساس تحفظ فراہم کریں، پنڈورا اور پاناما لیکس کے معاملات کو حتمی انجام تک پہنچائیں گے۔

امیر جماعت اسلامی سراج الحق کا مزید کہنا تھا کہ سپریم کورٹ سمیت ہر فورم پر عوام کا مقدمہ لڑا جائے گا، ماہ ربیع الاوّل کا تقاضا ہے ملک میں نظام مصطفیؐ کے لیے جدوجہد کی جائے، حضور پاکؐ کے اسوہ حسنہ کی پیروی میں ہی انسانیت کی فلاح ہے۔