رکن اسمبلی سردارعبد الرحمان کھیتران نے کہا ہے کہ وزیر اعلیٰ بلوچستان جام کمال خان کی کارکردگی مایوس کن ہے۔

تفصیلات کے مطابق بلوچستان اسمبلی میں اسپیکر عبد القدوس بزنجو کی زیر صدارت اجلاس ہوا، رکن اسمبلی سردارعبد الرحمان کھیتران نے وزیر اعلیٰ بلوچستان جام کمال خان کے خلاف تحریک عدم اعتماد قرارداد کی شکل میں ایوان میں پیش کی۔

اجلاس میں رکن اسمبلی سردارعبد الرحمان کھیتران نے اظہارِ خیال کرتے ہوئے کہا کہ جام کمال کے خلاف عدم اعتماد کی تحریک ان کی اپنی ہی جماعت بلوچستان عوامی پارٹی (بی اے پی) کے ناراض ارکان نے گیارہ اکتوبر کو اسمبلی سیکریٹریٹ میں جمع کروائی تھی، قرارداد میں مطالبہ کیا گیا کہ جام کمال خان کو خراب کارکردگی پر وزارت اعلیٰ کے منصب سے ہٹایا جائے، وزیر اعلیٰ کی حیثیت سے جام کمال عوام کو ریلیف دینے میں تین سال سے ناکام رہے۔

انہوں نے کہا کہ کہ وزیر اعلیٰ بلوچستان جام کمال خان کی کارکردگی مایوس کن ہے، خراب طرز حکمرانی کی وجہ سے مایوسی، بدامنی، بے روزگاری کے ساتھ اداروں کی کارکردگی بھی متاثر ہوئی ہے، وزیر اعلیٰ تمام معاملات تین سال سے بنا مشاورت کے چلاتے رہے۔

رکن اسمبلی سردارعبد الرحمان کھیتران کا کہنا تھا کہ وزیر اعلیٰ جام کمال خان نے بلوچستان کے حقوق کے حوالے سے وفاقی حکومت کے ساتھ آئینی اور بنیادی مسائل پرغیر سنجیدگی کا ثبوت دیا۔

دوسری جانب اجلاس میں اپوزیشن رہنماء ثناء بلوچ نے اظہارِ خیال کرتے ہوئے کہا کہ جام صاحب حکومت دولت پر قائم نہیں رہتی، حکومتیں امید اور صبر پر قائم رہتی ہیں۔

ثناء بلوچ کا کہنا تھا کہ لوگوں کی امید ریاست اور اداروں سے وزیر اعلیٰ جام کمال خان کی وجہ سے اٹھ گئی ہے، تین سالوں میں اداروں کو یرغمال بنانے کی پالیسی اپنائی گئی، بلوچستان خون کے آنسوؤں اور سیسکیوں سے گزر رہا ہے۔

اپوزیشن رہنماء ثناء بلوچ نے کہا کہ جام کمال صاحب کو خوش آمدیوں نے گھیر رکھا ہے، جام صاحب بلوچستان میں شہنشایت نہیں چل سکتی۔