وزیراعظم عمران خان نے  کہا ہے کہ حکومت مہنگائی کی وجہ سے غریبوں کو درپیش مسائل سے آگاہ ہے۔

تفصیلات کے مطابق وزیراعظم عمران خان کی زیر صدارت اجلاس ہوا جس میں ڈاکٹر ثانیہ نشتر نے وزیر اعظم کو احساس پروگرام کے تحت اہل خاندانوں کو ہدف بنائی گئی سبسڈی پر بریفنگ دی۔

اجلاس میں وزیراعظم کو بریفنگ دیتے ہوئے کہا گیا کہ احساس پروگرام نے نیشنل بینک آف پاکستان کے اشتراک سے ایک موبائل ایپ تیار کی ہے، یہ ایپلیکیشن دکاندار ملک بھر میں اہل احساس مستحقین کو رعایتی اشیاء فراہم کرنے کے لیے استعمال کریں گے۔

بریفنگ کے دوران مزید کہا گیا کہ احساس پروگرام کے تحت ہدف شدہ سبسڈی کے غلط استعمال کے امکانات کو ختم کرنے کے لیے مناسب احتیاط برتی گئی ہے۔

اجلاس کی صدارت کرتے ہوئے وزیراعظم عمران خان کا کہنا تھا کہ حکومت مہنگائی کے غریبوں پر پڑنے والے اثرات سے آگاہ ہے، ہدف شدہ سبسڈی غیر مراعات یافتہ طبقات کی ترقی کے لیے ہیں۔

وزیراعظم نے کہا کہ حکومت مہنگائی کی وجہ سے غریبوں کو درپیش مسائل سے آگاہ ہے، معاشرے کے غیر مراعات یافتہ طبقات کو ٹارگٹڈ سبسڈی فراہم کی جائے۔

 عمران خان کا کہنا تھا کہ کامیاب پاکستان ، صحت سہولت کارڈ اور احساس حکومت کے اہم پروگرام ہیں جس کا مقصد غربت کے خاتمے اور معاشرے کے نچلے طبقات کی سماجی ترقی ہے۔

وزیراعظم عمران خان کا مزید کہنا تھا کہ ایک جامع آگاہی پروگرام شروع کیا جائے، عوام کو آگاہ کیا جائے کہ ہدف شدہ سبسڈی کیسے حاصل کی جا سکتی ہے۔

اجلاس میں وزیر خزانہ شوکت فیاض ترین ، وزیر دفاع پرویز خٹک ، وزیر اطلاعات فواد چوہدری ، معاون خصوصی ڈاکٹر شہباز گل ، گورنر سٹیٹ بینک ڈاکٹر رضا باقر ، صدر نیشنل بینک اور سینئر افسران نے بھی شرکت کی۔