جماعت اسلامی کے نائب امیر لیاقت بلوچ نے کہا ہے کہ سندھ میں پیپلز پارٹی کا احتجاج مگرمچھ کے آنسووں اور عوام کو دھوکہ دینے کی کوشش ہے۔

تفصیلات کے مطابق جماعت اسلامی کے نائب امیر لیاقت بلوچ نے حیدرآباد میں پریس کانفرنس کرتے ہوئے کہا کہ حکومت اداروں کو لڑوانے کے کھیل سے باز رہے، عمران خان نے ریاست مدینہ کا نظام دینے کا اعلان کیا تھا مگر انہوں نے بد اخلاقی اور پگڑیاں اچھالنے میں قوم کا وقت ضائع کیا ہے۔

 لیاقت بلوچ کا کہنا تھا کہ اسلامی قوانین کو غیر موثر کرنے کا ایک کھیل کھیلا جارہا ہے جو ریاست مدینہ سے انحراف ہے، فوج کے ادارے کو چیف آف آرمی کے موقع پر اور اب ڈی جی آئی ایس آئی کی مقرری پر وزیر اعظم عمران خان نے نا قابل تلافی نقصان پہنچایا ہے، بلوچستان سے زوال کا سونامی شروع ہوا ہے پنجاب اور وفاق بھی اس کی زد میں آئے گا، بچاؤ کا راستہ ہے کہ عمران خان مستعفی ہوجائیں۔

انہوں نے کہا کہ بلدیاتی انتخاب کروایا جائے اور انتخابی اصلاحات کے ساتھ عام انتخابات کروائے جائیں، معیشت تباہ ہے، مہنگائی چوروں نے عوام کی جیبوں سے کھربوں روپے نکال لئے ہیں، اقتصادی پہیہ جام کر دیا گیا ہے ایک بار پھر سعودی حکومت نے رحم کھایا ہے جو پہلے ملا تو دوبارہ کیوں ضرورت پیش آئی ہے۔

جماعت اسلامی کے نائب امیر لیاقت بلوچ کا کہنا تھا کہ عمران خان ہر محاذ پر ناکام ہیں اور تیسری اقتصادی ٹیم بھی ناکام ہوچکی ہے، سندھ میں پیپلز پارٹی کا احتجاج مگرمچھ کے آنسووں اور عوام کو دھوکہ دینے کی کوشش ہے، سندھ میں گندہ پانی بد ترین نظام زندگی میرٹ کا قتل عام دیا ہے۔