وزیر خارجہ مخدوم شاہ محمود قریشی نے کہا ہے کہ نبی کریم ﷺ کی اسوہ حسنہ بنی نوع انسان کیلئے مشعل راہ ہے۔

تفصیلات کے مطابق عشرہ شان رحمت اللعالمین ﷺ ، ضلعی انتظامیہ کے زیر اہتمام سیرت النبی کانفرنس ہوئی جس میں وزیر خارجہ شاہ محمود قریشی، وزیر توانائی ڈاکٹر اختر ملک، ڈپٹی کمشنر عامر کریم خان نے شرکت کی۔

وزیر خارجہ مخدوم شاہ محمود قریشی نے کہا کہ نبی کریم ﷺ کی اسوہ حسنہ بنی نوع انسان کیلئے مشعلِ راہ ہے، رحمت اللعالمین ﷺ کے درس انسانیت پر عمل پیرا ہو کر دنیا و آخرت میں کامیابی حاصل کی جاسکتی ہے۔

وزیر خارجہ کا کہنا تھا کہ صبر و تحمل، برداشت، رواداری اور احترام انسانیت اسلامی معاشرے کا طرہ امتیاز ہے۔

وزیر توانائی ڈاکٹر اختر ملک کا کہنا تھا کہ آقائے دو جہاں کی اصولِ امانت اور صداقت ہمارے لئے مشعلِ راہ اور راہِ نجات ہیں، رسول اکرم ﷺ کی ذات اقدس حق کا پیغام ہے جس کی روشنی میں ہم آگے بڑھیں گے۔

ڈپٹی کمشنر عامر کریم خان نے کہا کہ نبی کریم ﷺ کی سیرتِ طیبہ اور ان کی تعلیمات پورے معاشرے کے لئے عملی نمونہ ہیں، وزیر اعظم عمران خان کی طرف سے رحمت اللعالمین ﷺ اتھارٹی کے قیام کا اعلان خوش آئند ہے۔

سیرتِ النبی کانفرنس میں درود و سلام کا نذرانہ اور ملک و قوم کیلئے دعا بھی کی گئی۔

واضح رہے کہ معاون خصوصی جاوید اختر انصاری، چیف ملک عامر ڈوگر، اراکین اسمبلی احمد حسن ڈیہڑ، سی پی او منیر مسعود مارتھ، ایم پی اے ظہیر الدین علیزئی، سلیم لابر سمیت اراکین اسمبلی بھی شریک ہوئے۔