کراچی نارتھ ناظم آباد میں پیٹرول پمپ پر دھماکے کے نتیجے میں جاں بحق ہونے والے افراد کو سپرد خاک کر دیا گیا۔

تفصیلات کے مطابق واقعے میں جاں بحق ہونے والے محمد زبیر، سفیر، ہمائیوں اور سلطان کی نمازِ جنازہ شہر کے مختلف علاقوں میں ادائیگی کے بعد مقامی قبرستانوں میں انہیں آہوں اور سسکیوں میں سپرد خاک کر دیا گیا۔

گزشتہ روز پیٹرول پمپ پر دھماکے کے نتیجے میں جاں بحق ہونے والے محمد زبیر کی 8 برس قبل شادی ہوئی تھی اور وہ ایک بیٹے کا باپ تھا، فیکٹری سے واپس گھر کی طرف جا رہا تھا اور پیٹرول ڈلوانے کے لیے پمپ پر رکا تھا۔

جاں بحق ہونے والا محمد زبیر نیو کراچی کا رہائشی اور فیکٹری سے گھر کی طرف جا رہا تھا جبکہ سفیر بلدیہ ٹاون کا رہائشی اور گھر سے جمشید روڈ پر بہن کے گھر جانے کے لیئے نکلا تھا، راستے میں موٹر سائیکل میں پیٹرول ڈلوانے رکے تھے کہ اجل آگئی۔

جاں بحق ہونے والا 32 سالہ سفیر بلدیہ ٹاؤن کا رہائشی تھا اور تین سال قبل اسکی شادی ہوئی تھی، گھر میں خوشی کی آمد متوقع ہے، سفیر اپنی بہن سے ملنے جمشید روڈ جا رہا تھا، راستے میں پیٹرول ڈلوانے رکا تھا۔

پولیس کا کہنا ہے کہ سوئی گیس کمپنی کی پیٹرولنگ ٹیم نے نارتھ ناظم آباد دھماکے کی جگہ کا دورہ کیا، ٹیم نے رپورٹ دی کہ عدم ادائیگی کی وجہ سے گزشتہ ایک ماہ سے سی این جی گیس کی سپلائی بند کی گئی تھی۔

پولیس کے مطابق زور دار دھماکہ ہوا تو شیشے کا گیٹ ٹوٹ گیا، ٹوٹنے والے شیشے پیٹرول پمپ پر موجود افراد کو لگے جس سے زیادہ اموات ہوئیں، بم ڈسپوزل اسکواڈ نے رپورٹ تیار کر کے کلیئرنس لیٹر جاری کردی ہے۔

بم اسکواڈ رپورٹ کے مطابق پمپ کے الیکٹرک روم میں پرانا اے سی موجود تھا، وہ کمرا مکمل پیک تھا کمرے میں گیس کے اخراج کے لیے کوئی کھڑکی موجود نہیں تھی، گیس کا پریشر بننے سے روم کے اندر الیکٹرک پینل میں شارٹ سرکٹ اور دھماکہ ہوا، دھماکے کا پریشر باہر کی طرف ریلیز ہوا۔