وزیر قانون پنجاب راجہ بشارت نے کہا ہے کہ قومی سلامتی کونسل کے فیصلے کے مطابق کالعدم تنظیم کو مذاکرات کا راستہ اختیار کرنا چاہیے۔

تفصیلات کے مطابق وزیر قانون پنجاب راجہ بشارت نے قومی سلامتی کونسل کے فیصلوں پر اظہارِ خیال کرتے ہوئے کہا کہ قومی سلامتی کونسل کے فیصلے کے مطابق کالعدم تنظیم کو مذاکرات کا راستہ اختیار کرنا چاہیے، کالعدم تنظیم کے کئی دنوں سے جاری احتجاج کے باعث پنجاب کے لاکھوں عوام شدید مشکلات کے شکار ہیں۔

راجہ بشارت کا کہنا تھا کہ احتجاج کے باعث سڑکیں اور ٹرانسپورٹ بند ہونے کی وجہ سے عام آدمی، مریض، طالبعلم اور کاروباری طبقہ سخت پریشان ہے، لاہور تا راولپنڈی ٹرانسپورٹ بند ہونے کی وجہ سے لوگوں کا کاروبار ٹھپ ہو کر رہ گیا ہے، مجموعی طور پر صوبے کی معیشت شدید متاثر ہو رہی ہے جس کا اثر غریب آدمی پر پڑے گا۔

انہوں نے کہا کہ ملک میں انتشار پھیلانے کے لیے سوشل میڈیا کا غلط استعمال ملکی سلامتی اور استحکام کے لیے خطرناک ہے، غیر ملکی پاکستان دشمن قوتوں کا آلہ کار بننا کسی لحاظ سے ملک اور دین کی خدمت نہیں ہے، ریاستی رٹ چیلنج کر کے مرضی کے فیصلے نہیں کروائے جا سکتے۔

وزیر قانون پنجاب راجہ بشارت کا کہنا تھا کہ ریاست آئین اور قانون کے تابع فیصلے کرتی ہے، اسے دباؤ میں نہیں لایا جا سکتا۔