حلیم عادل شیخ کا کہنا ہےکہ پنڈورا پر ڈھنڈورا پیٹنے والے خود صفائیاں دینے لگ گئے ہیں۔

تفصیلات کے مطابق اپوزیشن لیڈر سندھ اسمبلی حلیم عادل شیخ نے جاری کردہ اپنے بیان میں کہا ہے کہ تاریخ میں لکھا جائے گا کہ مٹھائی کبھی ن لیگ کو ہضم نہیں ہوئی، پنڈورا پر ڈھنڈورا پیٹنے والے خود صفائیاں دینے لگ گئے ہیں۔

 حلیم عادل شیخ کا کہنا ہےکہ شریف خاندان اورحواری عالمی سطح پر ملک کی بدنامی کا باعث بن رہے ہیں، کوئی ایسا اسکینڈل یا تحقیقات نہیں جس میں شریف خاندان کے کرتوت شامل نہیں، آصف زرداری کے منشیوں کے نام بھی پنڈورا پیپرز میں شامل ہیں۔

اپوزیشن لیڈر سندھ اسمبلی نے کہاکہ اشتہارات اور جعلی بھرتیوں کے پیسوں سے افشوز کمپنیاں بنائی گئی، پنڈورا پیپرز میں شامل نام قانون کے مطابق جوابدہ ہیں۔

حلیم عادل شیخ نے کہاکہ وزیراعظم کی جانب سے پنڈورا پیپرز معاملے پر تحقیقات خوش آئند ہے، وزیراعظم عمران خان ایک بار پھر انٹرنیشنل صادق و امین ثابت ہوچکے ہیں۔

واضح رہےکہ گزشتہ روز انٹرنیشنل کنسورشیم آف انویسٹی گیٹو جرنلسٹس (آئی سی آئی جے) نے صحافتی تاریخ کا سب سے بڑا اسکینڈل پنڈورا پیپرز بریک کردیا۔

تفصیلات کے مطابق پانامہ پیپرز کے بعد نئے مالیاتی اسکینڈل ‘پنڈورا پیپرز’ کی ہوشربا تفصیلات جاری کردی گئی ہیں جس کےمطابق 700سے زائد پاکستانی بے نقاب ہوگئے ہیں جبکہ پنڈورا پیپرز میں مجموعی طور پر 200 سے زائد ممالک کی 29 ہزار سے زائد آف شور کمپنیوں کی معلومات فراہم کی گئی ہیں۔

پنڈورا پیپرز میں وزیر خزانہ شوکت ترین ،مونس الہیٰ ،علیم خان اور فیصل واوڈا کی آف شور کمپنیاں سامنے آئیں جبکہ تحقیقات میں پنجاب کے سابق وزیر عبدالعلیم خان کی آف شور کمپنی، خسرو بختیار کے بھائی عمر بختیارعارف نقوی کی آف شورکمپنی اور پیپلز پارٹی کے شرجیل میمن کی آف شور کمپنی بھی سامنے آئی۔

تحقیقات میں مسلم لیگ ن کے رہنماء اسحاق ڈار کے بیٹے کی آف شور کمپنی بھی پنڈورا پیپرز میں شامل ہے جبکہ بینکاروں، کاروباری شخصیات کی آف شورکمپنیاں بھی سامنے آئیں ہیں۔

آئی سی آئی جے کے مطابق اس اسکینڈل نے دنیا بھر کی اشرافیہ کی چھپی ہوئی دولت کو بے نقاب کیا ہے۔ پنڈورا پیپرز کے نام سے پروجیکٹ میں 117 ممالک کی اہم شخصیات کی مالی تفصیلات شامل ہیں۔

خیال رہے کہ آئی سی آئی جے نے دو سال کی کڑی محنت کے بعد پنڈورا پیپرز تیار کیے ہیں جبکہ اس اسکینڈل کی تیاری میں 117 ملکوں کے 150 میڈیا اداروں سے وابستہ 600 سے زائد صحافیوں نے حصہ لیا۔

یہ انسانی تاریخ کی اب تک کی سب سے بڑی صحافتی تحقیق ہے جو ایک کروڑ 19 لاکھ خفیہ دستاویزت پر مشتمل ہے۔

یہ دستاویزات 14 آف شور سروس فرمز سے حاصل کی گئی ہیں۔
صحافیوں کی اسی تنظیم نے 2016 میں پاناما پیپرز جاری کیے تھے جس میں 444 پاکستانیوں کے نام شامل تھے۔