محکمہ موسمیات نے ٹھنڈی ٹھار پیش گوئی کرتے ہوئے کہا ہے کہ 10 اکتوبر سے مغربی ہواؤں کا پہلا باقاعدہ سلسلہ ٹھنڈی ہواؤں کے ساتھ ملک کے شمالی علاقوں میں داخل ہوگا۔

محکمہ موسمیات کے مطابق اسلام آباد، راولپنڈی، مری، گلیات، آزاد کشمیر، بالائی خیبرپختونخواہ، ہزارہ ڈویژن، اور کشمیر کے اکثر علاقوں میں 10 سے 12 اکتوبر کے درمیان موسم خزاں کی پہلی موسلادھار بارش کا امکان ہے۔

اس دوران بعض مقامات پر ژالہ باری بھی متوقع ہے۔

محکمہ موسمیات کے مطابق کشمیر، گلگت بلتستان اور بالائی خیبرپختونخواہ کے بلند پہاڑوں پر موسم سرما کی پہلی زبردست برفباری کا امکان ہے۔

10 اکتوبر سے ملک کے تمام شمالی علاقوں کو سردی کی پہلی کمزور لہر داخل ہونے کا امکان ہے، جس کے نتیجے میں بالائی علاقوں کے درجہ حرارت میں واضح کمی آنے کا امکان ہے۔

محکمہ موسمیات کے مطابق ملک کے وسطی علاقوں کے موسم میں بھی تبدیلی آنے کا امکان ہے۔

پاکستان سے مون سون 2021 اب رخصت ہو چکا اور اب مون سون کی جگہ مغربی سسٹم لیں گے۔

پہلا سسٹم 10 اکتوبر 2021 سے شروع ہونے جارہا ہے جس سے ملک بھر میں موسم یکسر تبدیل ہو جائے گا۔

محکمہ موسمیات کے مطابق بارشیں ابھی صرف بالائی علاقوں تک ہی محدود رہیں گے لیکن اثرات پورے ملک پر دیکھے جا سکیں گے۔ آنے والے اسپیل سے ملک کے شمالی علاقوں میں موسم خزاں کی پہلی اچھی برفباری متوقع ہے۔

چترال، سوات، گلگت بلتستان اور کشمیر کے اونچے پہاڑوں پر اس سسٹم سے پہلی برفباری ہوگی۔

خیبر پختون خواہ کے تقریباً 70 فیصد علاقوں میں اچھی بارش کا امکان ہے وادی پشاور سوات چترال بونیر بٹخیلہ ہری پور ہزارہ ڈویژن ایبٹ آباد مانسہرہ کوہاٹ بنوں چارسدہ پارو چنار، ٹانک ڈیرہ اسماعیل اورملحقہ علاقوں میں بارش کا امکان ہے۔

محکمہ موسمیات کے مطابق کشمیر میں مظفرآباد باغ نیلم اور انتہائی اونچے پہاڑوں پر اس دوران برفباری بھی متوقع ہے۔

اسلام آباد، راولپنڈی اور اٹک کے ملحقہ علاقوں میں اچھی بارش کا امکان ہے جبکہ چکوال جہلم میانوالی اور منڈی بہاؤ الدین اور ملحقہ علاقوں میں کہیں کہیں آندھی کے ساتھ ہلکی بارش یا بوندا باندی ہو متوقع ہے۔

باقی صوبے بھرمیں موسم خشک رہے گا اور درجہ حرارت میں دن بدن کمی کا امکان ہے۔

محکمہ موسمیات کے مطابق سندھ بلوچستان جنوبی پنجاب اور باقی ملک بھر میں موسم خشک رہے گا اور درجہ حرارت معمول کے مطابق رہیں گے اور بدستور کمی واقع ہوگی۔

 کراچی میں موسم کی صورتحال

محکمہ موسمیات کے مطابق  اب شہرقائد میں بارش کا امکان نہیں ہے۔

محکمہ موسمیات کے مطابق مغربی ہواؤں کے سلسلے میں شہر میں اکتوبر کے آخر میں بارش ہو سکتی ہے، 15 اکتوبر کے بعد رات کا درجہ حرارت کم ہونا شروع ہوگا۔

چیف میٹرولوجسٹ سردار سرفراز کا کہنا ہےکہ اکتوبر کا مہینہ عموماً گرم ہی ہوتا ہے، اکتوبر کے آخر سے رات میں خنکی ہونے لگتی ہے۔

آج کم سے کم درجہ حرارت 27 ڈگری سینٹی گریڈ ریکارڈ کیا گیا، آج زیادہ سے زیادہ درجہ حرارت 34 گری سینٹی گریڈ ریکارڈ کیا جانے کا امکان ہے۔

چیف میٹرولوجسٹ سردار سرفرازکے مطابق ہوا میں نمی کا تناسب 67 فیصد ریکارڈ کیا گیا، شہر میں 7 کلو میٹر فی گھنٹہ کی رفتار سے جنوب مغربی ہوا چل رہی ہے، شہر میں بارش کا کوئی امکان نہیں ہے۔