وزیراعلیٰ بلوچستان جام کمال خان نے کہا ہے کہ پولیو کے مکمل خاتمے کے لئے پوری طرح سے پرعزم ہیں۔

تفصیلات کے مطابق وزیراعلیٰ بلوچستان جام کمال خان نے عالمی یوم پولیو کے موقع پر خصوصی پیغام میں کہا کہ پولیو ایک حساس مسئلہ ہے جو حکومت کے لئے چیلنج کی حیثیت رکھتا ہے۔

جام کمال خان نے کہا کہ پولیو سے موثر طور پر نمٹنے کے لئے جنگی بنیادوں پر اقدامات کی ضرورت ہے، صوبائی حکومت پولیو کے  تدارک کو یقینی بنانے کے لئے تمام وسائل بروئے کار لارہی ہے۔

وزیراعلیٰ بلوچستان کا کہنا تھا کہ پولیو کے مکمل خاتمے کے لئے پوری طرح سے پر عزم ہیں، پولیو کا موذی مرض بچوں میں عمر بھر کی معذوری کا باعث بنتا ہے جس کے باعث  بچوں کی جسمانی نشوونما متاثر ہوتی ہے۔

جام کمال خان نے کہا کہ عوام میں پولیو کے حوالے سے بھرپور شعور اور آگاہی پیدا کرنے کی ضرورت ہے، اس حوالے سے علماء کرام، والدین، اساتذہ اور سول سوسائٹی اور میڈیا کا بھی کلیدی کردار ہے۔

وزیراعلیٰ بلوچستان کا کہنا تھا کہ معمول کے حفاظتی ٹیکہ جاتی نظام کو بھی مضبوط بنیادوں پر استوار کیا جارہا ہے، پولیو وائرس کے موثر تدارک سے ہی ہم اپنی آئندہ نسلوں کو ایک بہتر اور محفوظ مستقبل دے سکتے ہیں۔

جام کمال خان نے کہا کہ صحت عامہ صوبائی حکومت کی ترجیحات میں سرفہرست ہے، خاص طورسے بچوں کو پولیو سمیت دیگر امراض سے محفوظ رکھنے کے لئے جاری عمودی پروگراموں کے لئے خاطر خواہ فنڈز مختص کئے گئے ہیں۔

وزیراعلیٰ بلوچستان جام کمال خان کا مزید کہنا تھا کہ ہم اپنے بچوں کے مستقبل کو صحت مند اور محفوظ بنانے میں کوئی کسر اٹھا نہیں رکھیں گے۔