وزیر اعلیٰ پنجاب سردار عثمان بزدار نے کہا ہے کہ پنجاب کو کورونا کے باعث بڑے پیمانے پر جانی و مالی نقصان کا سامنا کرنا پڑا ہے۔

تفصیلات کے مطابق وزیر اعلیٰ پنجاب سردار عثمان بزدار کی ہدایت پر پنجاب کے تمام اضلاع میں شہریوں کو ان کی دہلیز پر کورونا ویکسین لگانے کی خصوصی مہم شروع کی گئی ہے۔

سردار عثمان بزدار نے کہا کہ شہریوں کو ان کی دہلیز پر کورونا ویکسینیشن کی خصوصی مہم 12 نومبر تک جاری رہے گی، روزانہ تقریباً 10 لاکھ شہریوں کو ویکسین لگانے کا ہدف مقرر کیا گیا ہے، پنجاب کو کورونا کے باعث بڑے پیمانے پر جانی و مالی نقصان کا سامنا کرنا پڑا ہے۔

انہوں نے کہا کہ پنجاب میں اب تک تقریباً 13 ہزار سے زائد افراد کورونا سے جاں بحق ہو چکے ہیں، پنجاب کی معیشت کو تقریباً 650 ارب روپے کا نقصان اٹھانا پڑا ہے، جانی و مالی نقصان سے بچنے کیلئے ویکسینیشن اور احتیاط ضروری ہے۔

سردار عثمان بزدار کا کہنا تھا کہ پنجاب حکومت نے شہریوں کی زندگیوں کے تحفظ کیلئے بڑے پیمانے پر ویکسینیشن مہم شروع کی ہے، شہریوں کو ان کے گھروں میں جا کر کورونا ویکسین لگائی جائے گی، ویکسینیشن مہم کو کامیاب بنانے کیلئے صوبہ بھرمیں 14 ہزار نئے ویکسینیشن سنٹرز قائم کئے ہیں۔

وزیر اعلیٰ پنجاب نے کہا کہ شہریوں کو ان کی دہلیز پر ویکسیشنیشن کیلئے 18 ہزار ٹیمیں تشکیل دی گئی ہیں، خصوصی ٹیمیں ہر محلے اور گاؤں میں جا کر مفت ویکسین لگائیں گی، ضلعی انتظامیہ اور ڈسٹرکٹ ہیلتھ اتھارٹیز اس مہم کو کامیاب بنانے کیلئے مشترکہ کاوشیں کریں گی، صوبائی وزراء، منتخب نمائندگان اور سماجی کارکنوں کو بھی مہم کی کامیابی کیلئے ذمہ داریاں سونپی گئی ہیں۔

وزیر اعلیٰ پنجاب سردار عثمان بزدار کا کہنا تھا کہ کورونا سے نجات کا واحد حل ویکسینیشن ہے، عوام سے اپیل کرتا ہوں کہ ویکسین لازمی لگوائیں، صوبائی وزیر صحت ڈاکٹر یاسمین راشد، سیکرٹری پرائمری و سیکنڈری ہیلتھ، ڈی جی پی آر اور متعلقہ حکام بھی اس موقع پر موجود تھے۔