اپوزیشن رہنماء ثناء بلوچ نے کہا ہے کہ بلوچستان خون کے آنسوؤں اور سسکیوں سے گزر رہا ہے۔

تفصیلات کے مطابق بلوچستان اسمبلی میں اسپیکر عبدالقدوس بزنجو کی زیر صدارت اجلاس ہوا، جس میں وزیر اعلیٰ بلوچستان جام کمال خان کے خلاف تحریک عدم اعتماد پیش کی گئی، اجلاس میں اپوزیشن رہنماء ثناء بلوچ نے اظہارِ خیال کرتے ہوئے کہا کہ جام صاحب حکومت دولت پر قائم نہیں رہتی، حکومتیں امید اور صبر پر قائم رہتی ہیں۔

ثناء بلوچ کا کہنا تھا کہ لوگوں کی امید ریاست اور اداروں سے وزیر اعلیٰ جام کمال خان کی وجہ سے اٹھ گئی ہے، تین سالوں میں اداروں کو یرغمال بنانے کی پالیسی اپنائی گئی، بلوچستان خون کے آنسوؤں اور سیسکیوں سے گزر رہا ہے۔

اپوزیشن رہنماء ثناء بلوچ نے کہا کہ جام کمال صاحب کو خوش آمدیوں نے گھیر رکھا ہے، جام صاحب بلوچستان میں شہنشایت نہیں چل سکتی۔

دوسری جانب اجلاس میں اپوزیشن لیڈر ملک سکندر ایڈوکیٹ نے اظہارِ خیال کرتے ہوئے کہا کہ آج اکثریت نے وزیر اعلیٰ جام کمال کیخلاف عدم اعتماد ظاہر کیا، تحریک عدم اعتماد کے متن میں پہلا لفظ خراب حکمرانی ہے، وزیر اعلیٰ بلوچستان جام کمال کا ضمیر بھی بتاتا ہوگا کہ عوام ان کے ساتھ نہیں ہے لیکن پھر بھی وہ ٹس سے مس نہیں ہورہے۔

اپوزیشن لیڈر ملک سکندر ایڈوکیٹ کا کہنا تھا کہ اگر ایک گھر میں بھی کچھ لوگوں کو تمام سہولیات ہوں اکثریت کی جانب سے اعتماد نہیں ہوگا، حکومت تمام وسائل کی اسودگی کے بروئے کار لائے، قائد ایوان کے فرائض میں شامل ہے کہ تمام اراکین اسمبلی کے حقوق کا تحفظ کیا جائے، جو صوبے کا نظام ہے اس میں خرابی پیدا نا کریں، وزیر اعلیٰ قانون پر عمل دار کو یقینی بنانے کا ذمہ دار ہوتا ہے۔

انہوں نے کہا کہ جب تک اراکین کو نہیں لایا جائے گا ہم یہاں بیٹھے رہیں گے، صوبے کے لوگ گیس اور بجلی کو ترس رہے ہیں، لوگ اپنے حقوق کے لئے سڑکوں پر ہیں، عوام کو کوئی تحفظ حاصل نہیں ہے۔