وزیر اعلیٰ پنجاب کے معاون خصوصی برائے اطلاعات حسان خاور نے کہا ہے کہ ڈیرہ غازی خان میں پی ڈی ایم کا تماشہ ناکام رہے گا۔

حسان خاور نے اپنے جاری کردہ ایک بیان میں کہا کہ ڈیرہ غازی خان کی غیور عوام منفی سیاست کے علمبرداروں کو رد کر دیں گے، ڈیرہ غازی خان میں پی ڈی ایم کا تماشہ ناکام رہے گا، چھوٹی سی جلسہ گاہ میں کرسیاں زیادہ نظر آرہی ہیں اور لوگ کم۔

انہوں نے کہا کہ ڈیرہ غازی خان کے لوگ وزیر اعظم عمران خان اور وزیر اعلیٰ سردار عثمان بزدار سے محبت کرتے ہیں، پی ڈی ایم کی پٹاری میں صرف چلے ہوئے کارتوس رہ گئے ہیں، چچا اور بھتیجی کبھی بھی ایک تھے نہ ہیں اور نہ ہوں گے۔

حسان خاور کا کہنا تھا کہ جہاں بھتیجی ہوتی ہے وہاں چچا غائب ہوتے ہیں اور جہاں چچا ہوتے ہیں وہاں بھتیجی غائب، مولانا فضل الرحمن ہمیشہ دوسرے کے کندھے پر بندوق رکھ کر چلانے کے عادی ہیں، مولانا یاد رکھیں کہ جو وعدہ بلاول نے ان سے کیا ہے اب شہباز شریف ان سے کریں گے۔

وزیر اعلیٰ پنجاب کے معاون خصوصی برائے اطلاعات حسان خاور نے مزید کہا کہ پاکستان کی عوام باشعور ہیں، منفی پراپیگنڈے میں نہیں آئیں گے، پی ڈی ایم کے ٹولے کا منفی سیاست سمیت جنازہ نکل چکا ہے، آر پار کے دعویداروں کے غبارے سے ہوا نکل چکی ہے، دیانتداری، ایمانداری اور شفافیت کی سیاست کے سامنے کرپٹ ٹولے کی کوئی حیثیت نہیں۔