پنڈورا پیپرز کے معاملے پر پی پی پی رہنما منظور وسان کا کہنا ہےکہ پنڈورا پیپرز سیل کا سربراہ وزیر اعظم کا ہونا سمجھ سے بالاتر ہے۔

تفصیلات کے مطابق پی پی پی رہنما اورسندھ کے مشیر زراعت منظور وسان نے میڈیا سے گفتگو کرتے ہوئے کہاکہ جن کی کمپنیاں نکلی ہے اس کو کمیٹی میں بلایا جائے گا اور کلین چٹ دی جائے گی۔

انہوں نے مزید کہاکہ یہ لیکس ختم نہیں ہوئیں اس کے بعد ایک اور سوئزرلینڈ لیک بھی آئے گی، اس حکومت کا کام ہےعوام کو الجھائے رکھو۔

 واضح رہےکہ اس حوالے سے گزشتہ روز پی پی پی رہنما اورسندھ کے مشیر زراعت منظور وسان نے پیش گوئی کرتے ہوئے کہا تھا کہ پنڈورا پیپرز عمران حکومت کے لیے خطرے کی گھنٹی ہے۔

منظور وسان نے ایک اور پیش گوئی کرتے ہوئے کہاکہ پنڈورا پیپرز جیسے مزید پنڈورا باکس کھلیں گے۔

ذرائع کے مطابق پی پی پی رہنما اورسندھ کے مشیر زراعت منظور وسان نے اس حوالے سے بات کرتے ہوئے کہاکہ شرجیل میمن کا پنڈورا پیپرز میں نام آنے پر کارروائی کا فیصلہ پارٹی قیادت کرے گی۔

انہوں نے کہاکہ 5 سال پہلے پیش گوئی کی تھی کہ بیوروکریٹس، سول، جنرل اور سیاسی لوگوں کے احتساب کا سلسلہ چلے گا۔

منظور وسان نے کہا کہ موجودہ سسٹم ملک نہیں چلاسکتا، پنڈورا پیپرز لیکس ہونے کے بعد حکومت کی وضاحتیں آنا کچھ تو دال میں کالا ہے۔

 پی پی پی رہنما کا کہنا ہے کہ ایسا نہ ہوکے نواز شریف جیسا حشر عمران خان کے ساتھ  ہو، پنڈورا پیپرز میں ملوث وزرا کو عمران خان فارغ نہیں کرے گا، اگر کرے گا بھی تو چار پانچ دن کے لیے، عمران خان پنڈورا پیپرز میں شامل اپنے وزرا کو کلین چٹ دے گا۔

واضح رہےکہ دو روز قبل انٹرنیشنل کنسورشیم آف انویسٹی گیٹو جرنلسٹس (آئی سی آئی جے) نے صحافتی تاریخ کا سب سے بڑا اسکینڈل پنڈورا پیپرز بریک کردیا۔

 پانامہ پیپرز کے بعد نئے مالیاتی اسکینڈل ‘پنڈورا پیپرز’ کی ہوشربا تفصیلات جاری کردی گئی ہیں جس کےمطابق 700سے زائد پاکستانی بے نقاب ہوگئے ہیں جبکہ پنڈورا پیپرز میں مجموعی طور پر 200 سے زائد ممالک کی 29 ہزار سے زائد آف شور کمپنیوں کی معلومات فراہم کی گئی ہیں۔

تحقیقات میں مسلم لیگ ن کے رہنماء اسحاق ڈار کے بیٹے کی آف شور کمپنی بھی پنڈورا پیپرز میں شامل ہے جبکہ بینکاروں، کاروباری شخصیات کی آف شورکمپنیاں بھی سامنے آئیں ہیں۔

آئی سی آئی جے کے مطابق اس اسکینڈل نے دنیا بھر کی اشرافیہ کی چھپی ہوئی دولت کو بے نقاب کیا ہے۔ پنڈورا پیپرز کے نام سے پروجیکٹ میں 117 ممالک کی اہم شخصیات کی مالی تفصیلات شامل ہیں۔

خیال رہے کہ آئی سی آئی جے نے دو سال کی کڑی محنت کے بعد پنڈورا پیپرز تیار کیے ہیں جبکہ اس اسکینڈل کی تیاری میں 117 ملکوں کے 150 میڈیا اداروں سے وابستہ 600 سے زائد صحافیوں نے حصہ لیا۔

یہ انسانی تاریخ کی اب تک کی سب سے بڑی صحافتی تحقیق ہے جو ایک کروڑ 19 لاکھ خفیہ دستاویزت پر مشتمل ہے۔ یہ دستاویزات 14 آف شور سروس فرمز سے حاصل کی گئی ہیں۔
صحافیوں کی اسی تنظیم نے 2016 میں پاناما پیپرز جاری کیے تھے جس میں 444 پاکستانیوں کے نام شامل تھے۔