پیس اینڈ کلچر آرگنائزیشن کی چیئر پرسن مشعال حسین ملک نے کہا ہے کہ عمر شریف کی موت پر دلی دکھ ہوا ہے۔

تفصیلات کے مطابق پیس اینڈ کلچر آرگنائزیشن کی چیئر پرسن مشعال حسین ملک نے معروف اداکار عمر شریف کی وفات پر گہرے دکھ و افسوس کا اظہار کرتے ہوئے کہا کہ عمر شریف نے اپنی ادکاری و مزاح سے پوری دنیا میں پاکستان کا نام روشن کیا، عمر شریف کی موت پر دلی دکھ ہوا ہے۔

مشعال ملک کا کہنا تھا کہ عمر شریف اپنی ادکاری سے لوگوں میں خوشیاں بکھیرتے رہے ہیں، عمر شریف کی تھیٹر و فن کے لیے ناقابلِ فراموش خدمات ہیں۔

پیس اینڈ کلچر آرگنائزیشن کی چیئر پرسن مشعال حسین ملک نے مزید کہا کہ اللہ پاک مرحوم کو جنت اور لواحقین کو صبرِ جمیل عطا کرے۔

واضح رہے کہ پاکستان کے مایہ ناز کامیڈین عمر شریف جرمنی میں انتقال کرگئے ہیں۔

عمرشریف کو طبیعت خرابی کے باعث جرمنی منتقل کیا گیا تھا ، عمر شریف عارضہ قلب اور دیگر مختلف بیماریوں میں مبتلا تھے، وہ گزشتہ کئی ہفتوں سے کراچی کے نجی اسپتال میں زیر علاج تھے۔

یاد رہے کہ عمر شریف کو علاج کے لیے امریکی دارالحکومت واشنگٹن پہنچایا  گیا تھا، جہاں معروف پاکستانی اداکارہ ریما خان کے شوہر اور ماہر امراض قلب ڈاکٹر طارق شہاب نے ان کے علاج کے لیے جارج واشنگٹن یونیورسٹی اسپتال میں انتظامات کر رکھے تھے۔

فخر پاکستان عمر شریف کی امریکا منتقلی اور اہل خانہ کے ویزوں کے لیے بھی ڈاکٹر طارق شہاب نے ہی تگ و دو کی تھی، عمر شریف کو لینے کے لیے ائیر ایمبولینس پیر کی دوپہر منیلا سے پاکستان پہنچی تھی۔

عمر شریف 19 اپریل1955 کو پیدا ہوئے ،عمرشریف نے اپنے کیریئر کا آغاز1974 میں14 سال کی عمر میں اسٹیج اداکاری سے کیا تھا ، عمرشریف کو بہترین اداکار اورڈائریکٹر کا ایوارڈ1992میں دیا گیا تھا،عمرشریف کوبہترین کارکردگی پرتمغہ امتیاز سے بھی نوازا گیا تھا۔