سربراہ پی ڈی ایم مولانا فضل الرحمن نے وفد کے ہمراہ معروف شاعر سید سلمان گیلانی کے گھر آمد کی ہے۔

تفصیلات کے مطابق مولانا فضل الرحمن نے سید سلمان گیلانی کی عیادت اور صحت یابی کے لیے دعا کی۔

 معاون خصوصی بلال میر، حافظ عبد الرحمن، حافظ زین العابدین وفد میں شامل ہیں، قاضی عبد الودود، مولانا بلال، حافظ غضنفرعزیز بھی سربراہ پی ڈی ایم مولانا فضل الرحمن کے ہمراہ ہیں۔

سربراہ پی ڈی ایم مولانا فضل الرحمان ہفتے کے روز شہباز شریف کی بھی عیادت کریں گے جس میں دونوں رہنماء 16 اکتوبر کو فیصل آباد میں پی ڈی ایم کے جلسے پر تبادلہ خیال کریں گے۔

واضح رہے اس سے قبل سربراہ جے یوآئی مولانا فضل الرحمان نے وفاق المدارس العربیہ کے زیرِ اہتمام خدمات مدارس دینیہ کنونشن سے خطاب کرتے ہوئے کہا تھا کہ تمام علوم کا مأخذ قرآن ہے، اسلام میں قومیت کی بنیاد پر تعصب کی کوئی گنجائش نہیں ہے، تعلیمی اداروں میں جنسی تعلیم فحاشی اور بے حیائی کا ذریعہ ہے۔

مولانا فضل الرحمان نے کہا تھا کہ شدت اور انتہاء پسندی نامناسب اور اعتدال مطلوب ہے، عبدیت اور عبادت خلافت کی پہلی شرط ہے، دینی مدارس میں تعلیم کے ساتھ عملی زندگی کی بہترین تربیت کی جاتی ہے، موجودہ حکومت کا ایجنڈا ہی دینداری کو کچلنا ہے،”آئین“ ریاست اور عوام کے درمیان میثاق ملی ہے۔

   سربراہ جے یوآئی مولانا فضل الرحمان کا کہنا تھا کہ مفتی محمود کے نزدیک ووٹ کی حیثیت ”بیعت“ کی ہے، جب ہم ووٹ کو”بیعت“ سمجھتے ہیں تو اس میں دھاندلی کسی بھی طرح برداشت نہیں کی جاسکتی، وفاق المدارس العربیہ اور جے یو آئی کے درمیان تعاون کا سلسلہ مسلسل جاری ہے، معیت علماء اسلام مدارس اور مذہبی طبقہ کی قوت ہے۔