ترجمان پنجاب حکومت حسان خاور نے کہا ہے کہ تحریک انصاف حکومت نے کھیلوں کے شعبے پر خصوصی توجہ دی ہے۔

تفصیلات کے مطابق معاون خصوصی وزیر اعلیٰ پنجاب برائے اطلاعات و ترجمان پنجاب حکومت حسان خاور نے وزیر کھیل پنجاب رائے تیمور بھٹی سے ملاقات کی ہے، محکمہ اسپورٹس میں معاون خصوصی برائے اطلاعات و ترجمان پنجاب حکومت کے لئے اسپورٹس منصوبہ جات اور کیلنڈر پر بریفنگ دی گئی۔

وزیر کھیل پنجاب نے ترجمان پنجاب حکومت حسان خاور کو اسپورٹس ڈویلمپنٹ اور منصوبوں پر آگاہ کیا، سیکرٹری اسپورٹس فواد ہاشم اور ڈی جی اسپورٹس عدنان ارشد اولکھ نے بریفنگ دی، اسپورٹس منصوبوں اور ایونٹس کی میڈیا سٹریٹیجی کے حوالے سے بھی بات چیت ہوئی۔

ترجمان پنجاب حکومت حسان خاور نے کہا کہ محکمہ اسپورٹس کے منصوبوں کے لئے بھرپور آگاہی مہم  شروع کی جائے گی، تمام پلیٹ فارمز پر کھیل اور کھلاڑیوں کی ترویج کی جائی گی۔

حسان خاور کا کہنا تھا کہ تحریک انصاف حکومت نے کھیلوں کے شعبے پر خصوصی توجہ دی ہے، پنجاب کے کھلاڑی بین اقوامی سطح پر ملک کا نام روشن کررہے ہیں، پنجاب حکومت کھیلوں کی ترقی کا کام جاری رکھے گی۔

وزیر کھیل پنجاب رائے تیمور بھٹی نے کہا کہ کھیلوں کے شعبے میں انقلابی کام کئے گئے ہیں، دہائیوں سے التوا کے شکار منصوبوں کو دوبارہ شروع کیا گیا ہے، لاہور میں انٹرنیشنل اسکواش کمپلیکس پر تعمیراتی کام 29 برس بعد شروع ہوچکا ہے۔

وزیر کھیل پنجاب کا کہنا تھا کہ پنجاب کی 38 تحصیلوں میں ملٹی پرپز اسپورٹس کمپلیکس زیرِ تکمیل ہیں، صوبے میں 105 سے زائد سافٹ گراؤنڈ مکمل کرلئے گئے ہیں، پنجاب میں جیلوں اور پارکس میں 40 جم بھی قائم کئے جارہے ہیں۔