ترجمان وزیر اعظم، معاون خصوصی برائے سیاسی ابلاغ ڈاکٹر شہباز گِل نے کہا ہے کہ روٹی، کپڑا اور مکان کا جھانسہ دے کر لوٹنے والے بے شرمی کے اعلیٰ مقام پر ہیں۔

تفصیلات کے مطابق ترجمان وزیر اعظم، معاون خصوصی برائے سیاسی ابلاغ ڈاکٹر شہباز گِل نے مریم اورنگزیب کے بیان پر رد عمل دیتے ہوئے کہا کہ پیپلز پارٹی کے دور میں کرپٹ ٹولے کی ترقی ہوئی، مزدور، کسان اور عام عوام کا پیسہ جعلی اکاؤنٹس کے ذریعے لانڈر کیا گیا، روٹی، کپڑا اور مکان کا جھانسہ دے کر لوٹنے والے بے شرمی کے اعلیٰ مقام پر ہیں۔

ڈاکٹر شہباز گِل کا کہنا تھا کہ جنہیں عوام نے علاقائی جماعت بنا ڈالا وہ وفاق کے سپنے دیکھ رہے ہیں، دنیا میں مہنگائی تاریخی بلندی پر ہے، پرچی چیئرمین کسان اور مزدور کا نام لے کر ذاتی سیاسی فوائد حاصل کرنے تک محدود ہے۔

انہوں نے کہا کہ کورونا میں غریب، مزدور اور کسان کے ساتھ عزیر اعظم عمران خان کھڑے ہوئے، کسان دوست پالیسیوں کی بدولت گزشتہ سال کسانوں کو 1100 ارب کی ریکارڈ آمدن ہوئی، کسان دوست پالیسیوں کی بدولت کسان خوشحال اور ریکارڈ فصلیں پیدا کر رہا ہے۔

ترجمان وزیر اعظم، معاون خصوصی برائے سیاسی ابلاغ ڈاکٹر شہباز گِل کا کہنا تھا کہ ملک میں 83 لاکھ کسانوں کا سوچنے والا صرف عمران خان ہے، کورونا کے باوجود صنعتیں اور کاروبار کھول کر غریب مزدور کا چولھا جلانے والا بھی صرف عمران خان ہی ہے۔